मडगांव शारांतल्या उड्डाण पूल रस्त्याच्या बांदकामा खातीर येरादारीचेर तात्पुरतो निर्बंध

ता. 18 एप्रिल 2026

मडगांव शारांतल्या पॉवर हाऊस सर्कल/दवर्ली सर्कल ते रावणफोंड सर्कला मेरेन 4-लेन उड्डाण पूल रस्त्याचे बांदकाम चालू आसून ह्या उड्डाण पूल रस्त्याच्या खांब्याचेंर काँक्रिटाच्यो पाटयों (girder) उबारपाचे काम 20 ते 24 एप्रिल 2026 मेरेन करपात येतले. गर्डर उबारपाचे काम चालू आसतना कसलोय अडथळो येवचो न्हय आनी सुरक्षीत पणान काम जावचे म्हूण पॉवर हाऊस सर्कल/दवर्ली सर्कल ते रावणफोंड सर्कला मेरेनच्या वाठारांत येरादारीचेर निर्बंध घातल्या.

पॉवर हाऊस सर्कल/दवर्ली सर्कल ते रावणफोंड सर्कला मेरेनच्या रस्त्याचेर येरादारीचेर पुराय पणान निर्बंध आसतलो जाल्यार पॉवर हाऊस सर्कल/दवर्ली सर्कल ते ओल्ड स्टेशन रोड सर्कल रस्त्याचेर फकत एम्बुलन्स आनी उजो पालोवपी दळा सारख्या एमर्जन्सी वाहनांक प्रवेश आसतलो.

गर्डरांची पुलामेरेन येरादारी आनी ते क्रेनीन खांब्यांचेर चडोवपाचे काम सोमार 20 एप्रिल दिसा सकाळी 7.30 ते दनपारां 3.30 वरा मेरेन, मंगळार 21 एप्रिल दिसा सकाळी 8.00 ते दनपारां 3.00 मेरेन आनी रातची 9.00 ते बुधवार 22 एप्रिल दिसा सकाळी 5.00 मेरेन आनी सांजेची 5.00 ते बिरेस्तार 23 एप्रिल दिसा मध्यान राती मेरेन, बिरेस्तार 23 एप्रिल दिसा सकाळी 6.30 ते दनपारां 2.00 वरा मेरेन आनी शुक्रार 24 एप्रिल दिसा सकाळी 7.30 ते दनपारां 1.00 वरा मेरेन जातले.

उड्डाण पूल रस्त्याच्या खांब्याचेंर काँक्रिटाच्यो पाटयों (girder) उबारपाचे काम वेळार आनी सुरक्षीत पणान पुर्ण करपा खातीर लोकांनी सहकार्य करचे, अशें गोंय राज्य साधनसुविधा विकास म्हामंडळान मागला.

म्हा /सप/ / विगां/ 2026/264