मुख्यमंत्र्या हस्तुकीं ‘तारें जमीं पर’ गाडयेंचें उक्तावण

शिक्षण हे विद्यार्थ्यांक कुशळ, आत्मविश्वासू आनी फुडाराखातीर तयार करपी आसपाक जाय- मुख्यमंत्री

ता. 15 एप्रिल 2026

शाळांतल्या अणभवात्मक शिक्षणाक बळकटी दिवपाच्या दिकेन एक म्हत्वाचे पावल म्हूण गोंय सरकारन आयज कुंभारजुवा हांगाच्या पी.एम. श्री विद्यालयांत “तारे जमीन पर” मोबाईल STEM आनी डिजिटल प्लॅनेटेरियम उपक्रमाचें उक्तावण जालें. मुख्यमंत्री डॉ. प्रमोद सावंत हांणी “तारे जमीन पर” अशें नाव दिल्ल्या गाडयेक बावटो दाखोवन उपक्रमाचें उक्तावण केले. ह्या उपक्रमाचो उद्देश राज्यभरातल्या विद्यार्थ्यां मेरेन संवादात्मक आनी प्रत्यक्ष कृतीतल्यान विज्ञान शिक्षण पावोवप हो आसा.

ह्या मोबायल व्हॅनीत एक डिजिटल तारांगण आसा, जे थेट शाळांनी खगोलशास्त्र आनी अवकाश विज्ञानाचे अणभवात्मक कार्यक्रम सादर करतले. ह्या उपक्रमा वरवीं विद्यार्थ्यांक प्रत्यक्ष कृतीतल्यान शिकपाक मेळटले आनी वैज्ञानिक संकल्पनांचो अणभव घेवपाक मेळटलो. हो उपक्रम राज्यांतल्या सरकारी आनी अनुदानित शाळांना राबयतले.

ह्या वेळार उलयतना मुख्यमंत्री डॉ. प्रमोद सावंत हांणी, हो उपक्रम शिक्षणाक आधुनिकतेची जोड दिवन आमच्या विद्यार्थ्यांखातीर जिज्ञासा, नवनिर्मिती आनी संशोधनाचे नवीन मार्ग उकते करतलो. गोंयचे शिक्षण हे फकत शिक्षणीक गरजे पुरते मर्यादित न उरता विद्यार्थ्यांक आत्मविश्वासू, कुशळ आनी भविश्याखातीर तयार करपी आसपाक जाय, अशें तांणी नमूद केले. ह्या कार्यक्रमा वरवीं पाचवी ते धावीच्या विद्यार्थ्यांक संवादात्मक सहभागातल्यान विज्ञानिक दिश्टीकोन, सर्जनशीलता आनी चिकित्सक विचार करपाक प्रोत्साहन मेळटले, अशें तांणी सांगलें.

मुख्यमंत्री डॉ. सावंत हांणी, एक संरचित करिअर शिक्षण कार्यक्रम सुरू करपा खातीर गोंय राज्य शिक्षणीक संशोधन आनी प्रशिक्षण मंडळ आनी अंतरंग फाउंडेशन हांचेमदी समजीकाय कबलात जाल्ल्याचें सांगून उच्च शिक्षण घेवपी विद्यार्थ्यांक करिअर निवड आनी भविश्यातल्या संधींचो लाव घेवपाक तयार करपाक मजत जातली, अशेंय तांणी सांगलें.

ह्या कार्यक्रमाक शिक्षण सचीव श्री प्रसाद लोलयेकर, आमदार श्री राजेश फळदेसाय, शिक्षण संचालक श्री शैलेश झिंगडे, गोंय राज्य शिक्षणीक संशोधन आनी प्रशिक्षण मंडळाच्यो संचालक श्रीमती मेघना शेटगावकर, पी. एम. श्री शाळेचे मुख्याध्यापक, शिक्षक आनी विद्यार्थी उपस्थित आशिल्लें.

म्हा /सप/ / विगां/ 2026/252