फोंडा येथे पुण्यश्लोक अहिल्यादेवी होळकर नारी शक्ती सन्मान २०२६ मध्ये महिला कर्तृत्ववानांचा सन्मान

महिलांमध्ये बाजारपेठेचे नेतृत्व करण्याची आणि संधी निर्माण करण्याची क्षमता- मुख्यमंत्री

४ जून २०२६

सामाजिक विकास, सामुदायिक नेतृत्व आणि सक्षमीकरणामध्ये महिलांच्या योगदानाला मान्यता देत, पुण्यश्लोक अहिल्यादेवी होळकर नारी शक्ती सन्मान २०२६ हा पुरस्कार फोंडा येथील राजीव कला मंदिरात आयोजित करण्यात आला होता. गोवा सरकारच्या ग्रामीण विकास प्राधिकरणाने समृद्धी फाउंडेशन गोवा यांच्या सहकार्याने आयोजित केलेल्या या कार्यक्रमात ग्रामीण विकास आणि उपजीविका प्रोत्साहन यांच्याशी संबंधित महिला नेतृत्व, स्वयं-सहायता गट, सामाजिक संस्था आणि हितधारक एकत्र आले होते.

पुण्यश्लोक अहिल्यादेवी होळकर यांच्या वारशाला समर्पित या कार्यक्रमात नेतृत्व, लोकसेवा, स्वावलंबन आणि सामाजिक जबाबदारी या मूल्यांचा गौरव करण्यात आला. या प्रसंगी विविध समाजांमध्ये सकारात्मक बदल घडवून आणण्यात महिलांच्या भूमिकेवर प्रकाश टाकण्यात आला आणि अधिक समावेशक व प्रगतीशील समाज घडविण्यासाठी दिलेल्या त्यांच्या योगदानाचा गौरव करण्यात आला. या कार्यक्रमाचा एक भाग म्हणून, समाजकल्याण, सामाजिक सेवा, नेतृत्व आणि महिला सक्षमीकरण या क्षेत्रांतील योगदानाबद्दल श्रीमती आशा सावर्डेकर, श्रीमती पल्लवी साळगावकर आणि श्रीमती दिपाली नाईक यांना ‘नारी शक्ती सन्मान २०२६’ प्रदान करण्यात आला.

उपस्थितांसमोर बोलताना, मुख्यमंत्री डॉ. प्रमोद सावंत यांनी महिला सक्षमीकरण आणि सामाजिक विकासावर लक्ष केंद्रित करणाऱ्या एका अर्थपूर्ण उपक्रमाची संकल्पना मांडल्याबद्दल समृद्धी फाउंडेशन आणि आयोजकांचे अभिनंदन केले. अहिल्याबाई होळकर यांच्या जीवन आणि योगदानाचे स्मरण करून, त्यांनी अहिल्याबाईंना धैर्य, दूरदर्शी नेतृत्व, सुशासन आणि लोककल्याणाप्रती असलेल्या वचनबद्धतेचे एक चिरस्थायी प्रतीक असल्याचे सांगितले.
गोव्यातील कुणबी साडीच्या यशस्वी पुनरुज्जीवनाचे उदाहरण देत, मुख्यमंत्री डॉ. सावंत यांनी पारंपरिक वारसा जतन करण्यासोबतच शाश्वत आर्थिक संधी निर्माण केल्याने महिलांना सक्षम करता येते आणि स्थानिक समुदाय अधिक मजबूत होतो असे नमुद केले. अधिक आर्थिक सहभागाच्या गरजेवर जोर देत, त्यांनी महिलांनी केवळ नोकरी शोधण्यापलीकडे जाऊन उद्योजिका आणि संपत्ती निर्माण करणाऱ्या बनायला हवे असे सांगितले.

डिजिटल मार्केटिंग, बाजार-केंद्रित व्यवसायाच्या संधी, उद्योजकता विकास आणि उपजीविका निर्मिती या विषयांवरील कार्यशाळेने सहभागींना व्यवसाय वाढ, नावीन्य आणि उत्पन्न निर्मितीच्या उदयोन्मुख मार्गांची ओळख करून दिली. या उपक्रमाने महिला आणि बचत गटांना आर्थिक प्रगती आणि आत्मनिर्भरतेसाठी नवीन संधी शोधण्यास प्रोत्साहित केले.

या कार्यक्रमाला राज्यसभेचे खासदार श्री सदानंद शेट तानावडे, ग्रामीण विकास प्राधिकरण सचिव, श्री अर्जुन मोहन आयएएस, समृद्धी फाउंडेशन गोवा अध्यक्ष श्री अमेय एम. आमशेकर, ग्रामीण विकास खात्याचे श्री संगम पाटील, डीआरडीए दक्षिण गोवा प्रकल्प संचालक श्रीमती दिपाली नाईक, महिला उद्योजक, बचत गट सदस्य, समाजसेवक, समुदाय नेते आणि राज्यभरातील इतर मान्यवर उपस्थित होते.

मा/वाप/अहे/एपी/रना/२०२६/३६८