धरती आबा सुविधा केंद्र स्थापन करपा खातीर अर्ज मागयल्यात

ता. 24 जुलय 2026

आदिवासी कल्याण संचालनालयान आदिवासी समुदायांक सक्षम करपाचो वावर करपाक “धरती आबा सुविधा केंद्र” स्थापन करपा खातीर सोसायटी नोंदणी कायदो 1860 खाला नोंदणीकृत बिगर सरकारी संस्था (NGOs) वा सक्षम प्राधिकरणाकडेन नोंदणीकृत चॅरिटेबल ट्रस्टाकडल्यान अर्ज मागयल्यात. आदिवासी समुदायांक सक्षम करपाच्या उद्देशान स्थापन केल्ल्या नोंदणीकृत बिगर सरकारी संस्था (NGOs) वा चॅरिटेबल ट्रस्टात कमीत कमी 50 टक्के सदस्य अनुसूचित जमाती समुदायाचे आसपाक जाय. अनुसूचित जमाती समुदायाक थळाव्या पांवड्यार मजत आनी विकासा वरवीं सक्षम करप हो ह्या केंद्राचो उद्देश आसा.

मोरपिर्ला, खोतीगांव, गांवडोंगरी, नेतुर्ली, खोला, मळकर्णे, श्रीस्थळ, पैंगिणी आनी किर्लपाल दाभाळ ग्रामपंचायत वाठारांत प्रत्येकी एक “धरती आबा सुविधा केंद्र” स्थापन करपा खातीर सुवात निश्चित केल्या.

धरती आबा सुविधा केंद्राखाला उपक्रम चालीक लावपा खातीर बिगर सरकारी संस्था चॅरिटेबल ट्रस्टाक फुडले प्रमाण आर्थिक सहाय्य अनुदान मंजूर करपात येतले- आवर्त अनुदान: खंयच्याय शाखेतल्या पदवीधर एका रिसोर्स व्यक्ती खातीर 3 टक्के वर्सुकीं वाडिसयत दर म्हयन्याक 30,000/- रूपया (फकत तीस हजार रुपया) निश्चित मानधन, एका मल्टिटास्कींग कर्मचाऱ्याखातीर खातीर 3 टक्के वर्सुकीं वाडिसयत दर म्हयन्याक 18,000/- रूपया (फकत अठरा हजार रुपया) निश्चित मानधन, प्रामुख्यान संबंदीत ग्रामपंचायतीतल्या दोन स्वयंसेवकांखातीर 3 टक्के वर्सुकीं वाडिसयत दर म्हयन्याक 25,000/- रूपया (फकत पंचवीस हजार रुपया) निश्चित मानधन, निश्चित रक्कम. स्टेशनरी, प्रिंटिंग, आनी हेर अशा खर्चाखातीर दर वर्साक निश्चित 25,000/- रूपया रक्कम (फकत पंचवीस हजार रुपया), भौशीक बांदकाम खात्याच्या इमारत विभागान जारी केल्ल्या प्रमाणपत्रानुसार भाडे, जाची कमाल मर्यादा दर म्हयन्याक 10,000/- (फकत धा हजार रुपया) आसतली. वयल्या भाड्यात दर 3 वर्सांनी निश्चित केल्ल्या प्रत्यक्ष भाड्यात 10 टक्के वाड करपात येतली. तशेंच ह्या येवजणे खाला आयोजीत उपक्रमांवयलो खर्च भागोवपा खातीर दर वर्साक 1 लाख रूपया (फकत एक लाख रुपया) दितले.

तेच प्रमाण अनावर्ती अनुदान: डेस्कटॉप संगणक, यूपीएस, प्रिंटर/स्कॅनर, स्मार्टफोन, संगणक टेबल, कपाट, टेबल, खुर्च्या आनी हेर खरेदी खातीर 1,50,000/- रूपया (फकत एक लाख पन्नास हजार रूपया) चे एक-वेळ आर्थिक अनुदान दितात. सगल्या मालमत्तेची खरेदी आदिवासी कल्याण संचालनालयाच्या नावान करतले. अनुदान बंद जाल्या उपरांत वा येवजण बंद जाल्या उपरांत ही मालमत्ता आदिवासी कल्याण संचालनालयाक परत करतले.

इत्सुक बिगर सरकारी संस्था (NGOs) वा चॅरिटेबल ट्रस्टांनी परिशिष्ट – अ प्रमाण विहित अर्जात तारीख 7 ऑगस्ट 2026 मेरेन अर्ज करपाक जाय. अर्ज आदिवासी कल्याण संचालनालय, पाटो पणजी मडगांवां उप संचालक कार्यालयात उपलब्ध आसा. अर्जा वांगडा सदस्यांची अनुसूचित जमाती (ST) प्रमाणपत्रां, संस्थां नोंदणी प्रमाणपत्राची प्रत, घटनापत्रक/कायद्याची प्रत, ट्रस्टच्या वांगड्यांचे विश्वस्तपत्र (ट्रस्ट डीड), सगळ्यां सदस्यांच्या आधार कार्डची प्रत, बँक पासबुकाची प्रत, बँक मॅन्डेट फॉर्म, भौशीक बांदकाम खात्यान (इमारत विभाग) जारी केल्ले भाडे प्रमाणपत्र, जीपीएस (GPS) निर्देशांकांसयत वापरपाच्या सुवातेचो फोटो, आदिवासी समाजाच्या विकासा खातीर सुरू केल्ल्या उपक्रम/ प्रकल्प अहवाल, संस्था /ट्रस्टान दिल्ले हमीपत्र जोडपाक जाय.

अदीक म्हायती खातीर आदिवासी कल्याण संचालनालयाच्या कार्यालयात भेट दिवची वा 0832-2438024 क्रमाकाचेर संपर्क करचो.

म्हा /सप/ / विगां/ 2026/480