तरणाट्यांनी स्वातंत्र्य सैनिकांच्या त्यागापसून प्रेरणा घेवपाची गरज- शिरोडकर

ता. 18 जून 2026

उदकास्त्रोत मंत्री श्री. सुभाष शिरोडकर हांणी गोंय मुक्ती खातीर त्याग केल्ल्या ज्ञात-अज्ञात स्वातंत्र्य सैनिकांचो उगडास करपाची गरज आशिल्ल्याचें सांगून युवकांनी तंत्रज्ञानाच्या युगात इनोव्हेशन आनी सर्जनशीलतायेचे गिन्यान आत्मसात करतना देशभक्तीची मुल्यां उचलून धरपाची मागणी केली.

गोंय क्रांती दिसानिमतान फोंडेच्या क्रांती मैदानाचेर आयोजीत कार्यक्रमात फुडें उलयतना शिरोडकर हांणी सांगलें, युवा पिळगेन गोंय मुक्ती चळवळीचो इतिहास जाणून घेवपाक जाय आनी गोंयच्या समृध्द दायजाचो अभिमान बाळगूपाक जाय. आमच्या जाण्ट्यांनी मुक्तीपुर्व काळांत देव-देवतांच्यो मुर्तीं आनी देवळांचे रक्षण करून सांस्कृतीक वारसो सांबळून दवरलो, अशेंय तांणी सांगलें.

भारत देश प्रधानमंत्री श्री. नरेंद्र मोदी हांच्या फुडारपणाखाला उदरगतीच्या मळार नेटान पावलां मारता, अशेंय मंत्र्यान सांगलें.

सुरवातीक श्री. शिरोडकर हांणी हुतात्मा स्मारकाचेर पुष्पचक्र अर्पण करून स्वातंत्र्य सैनिक आनी हुतात्म्यांक आर्गां ओपली.

क्रांती मैदानाचेर उदकास्त्रोत मंत्र्याक अतिरिक्त जिल्हाधिकारी श्री विशाल कुंडईकर आनी उपजिल्हाधिकारी श्री अमितेश शिरवयकर हांणी येवकार दिलो

फोंडा नगरपालिकेचे नगराध्यक्ष विरेंद्र ढवळीकर, 6टीटीआर चे कमांडिग ऑफिसर शांतनू कौशिक आनी हेर अधिकारी कार्यक्रमाक उपस्थित आशिल्लें.

ह्या वेळार फोंडा वाठारांतल्या विविध शाळांतल्या विद्यार्थ्यांनी देशभक्ती गीतां सादर केली.

गिरीश वेळगेकर हांणी कार्यक्रमाचे सूत्रसंचालन केले.

म्हा /सप/ / विगां/ 2026/429