खांडोळें सरकारी महाविद्यालयाच्या ‘अहिल्या’ ह्या चलयांच्या हॉस्टेलाचें उक्तावण नारी शक्ति सशक्तिकरण ही आमची जापसालदारकी आनी विकसीत समाजाची बुन्याद- मुख्यमंत्री

ता. 22 एप्रिल 2026

मुख्यमंत्री डॉ. प्रमोद सावंत हांणी आयज खांडोळें हांगाच्या सरकारी कला, विज्ञान आनी वाणिज्य म्हाविद्यालय कॅम्पसांत नव्यान बांदिल्ल्या ‘अहिल्या’ ह्या चलयांच्या वसतीघराचें उक्तावण केले. प्रियोळ मतदारसंघाचे आमदार श्री. गोविंद गावडे, कुंभारजुवा मतदारसंघाचे आमदार श्री. राजेश फळदेसाय, जीएसआयडीसी चे वेवस्थापकीय संचालक श्री रोहित कदम, शिक्षण सचीव प्रसाद लोलयेंकार, उच्च शिक्षण संचालक भूषण सावयकार, जिल्हा पंचायत वांगडी सुनील जल्मी, बेतकी खांडोळेच्यो सरपंच श्रध्दा फडते आनी हेर मानेस्त आनी अधिकारी उक्तावण कार्यक्रमाक उपस्थित आशिल्लें.

ह्या वेळार उलयतना मुख्यमंत्री डॉ. प्रमोद सावंत हांणी नारी शक्ति सशक्तिकरण ही आमची जापसालदारकी आनी विकसीत समाजाची बुन्याद आशिल्ल्याचें सांगून सरकाराचे आस्पावीत विकासाचे उद्दीश्ट पुर्ण करपा खातीर महिलांच्या सशक्तिकरणाक प्राधान्य दिवपाची गरज आशिल्ल्याचें नमूद केले. महिला वर्ग सुशिक्षीत, सुरक्षीत आनी स्वावलंबी जाल्याबगर समाजाची उदरगत जावपाक शकना आनी गोंयच्या दरेक चली भुरग्याक आपले शिक्षण कसल्याच आडमेळी बगर घेवपाक मेळचे, हे खातीर सरकार कटीबद्द आसा, अशें तांणी सांगलें.

उद्देग आनी शिक्षणीक संस्थांमदले संबंध मजबूत करपाची गरज व्यक्त करून मुख्यमंत्र्यान शिक्षकांनी विद्यार्थ्यांक करियर मार्गदर्शन करपाक आनी युपीएससी आनी जीपीएससी सारख्या स्पर्धात्मक परिक्षा खातीर तयार करपाक प्रोत्साहन दिवपाक सांगलें. राणी अहिल्याबाई होळकरांचे नेतृत्व, राज्यकारभार आनी लोककल्याणकारी वावराचो उल्लेख करून मुख्यमंत्र्यान विद्यार्थ्यांक तांच्या जीणेपसून प्रेरणा घेवन आपले उज्वल भविश्य घडोवपाचो सल्लो दिलो.

जीएसआयडीसी न 7.25 कोटी रूपया खर्च करूनउबारिल्ल्या वसतीघरांत 28 कुडी आसात, दरेक कुडींत दोन विद्यार्थ्यांक रावपाची वेवस्था आसतली. तशेंच मेस, मनरिजवण कक्ष, योग आनी ध्यान कक्ष, वाचनालय, स्टेशनरी कक्ष, कपडे उमळपाचो कक्ष आनी हेर सुविधा आसा. तशेंच खेळपा खातीर बॅडमिंटन कोर्ट आसा. प्रकल्पात सुरक्षीत वातावरणा खातीर सीसीटीव्ही सुरक्षा यंत्रणां बसयल्यात.

म्हा /सप/ / विगां/ 2026/279