खण वेवसाय प्रभावीत वाठारांतल्या शेतकारांक म्होंवा उत्पादन घेवपाक प्रोत्साहन

ता. 20 मे 2026

आयज पणजे उत्तर गोंय जिल्होधिकारी कार्यालयांतल्या परिशद सभाघरांत आयोजीत कार्यक्रमात उत्तर गोंय जिल्होधिकारी श्री. अंकीत यादव हांच्या उपस्थितीत “गोवा अमृतकुंभ म्होंवा उत्पादन” ब्रॅण्डाचो शुभारंभ जालो.

उत्तर गोंय जिल्हो मिनरल फाऊंडेशनान “अत्मा” च्या तांत्रिकी सहकार्यान खण वेवसाय प्रभावीत वाठारांतल्या शेतकारांक म्होंवामूस पोसपाचे प्रशिक्षण दिवन तांका उपजीविकेचे साधन निर्माण करपा खातीर खास प्रकल्प येवजण चालीक लायल्या. ह्या येवजणेची अंमलबजावणी, शेतकारांक प्रशिक्षण आनी तांच्या म्होंवा उत्पादनाक मार्केटिंग सुविधा मेळोवन दिवपा खातीर बार्देस म्होंवामूस पालन संस्थेची निवड केल्या. ह्या प्रकल्पा खाला पयल्या टप्प्यात उत्तर गोंयांतल्या खण वेवसाय प्रभावीत वाठारांतल्या 20 शेतकारांक म्होंवामूस पोसपाचे प्रशिक्षण दिवन वेवसाया खातीर लागपी आवश्यक साधनांची पुरवण केल्या. शेतकारांनी आता मेरेन प्रती किलो 900/- रूपया दरान 30 किलो परस चड म्होंवाची संस्थेक विक्री केल्या. बार्देस म्होंवामूस पालन संस्थे कडल्यान शेतकारांक आवश्यक प्रशिक्षण आनी मार्गदर्शन, यंत्रणां आनी साधनांची पुरवण, म्होंव काडपाक तांत्रिक मजत आनी म्होंव विकते घेवपाक सहकार्य मेळटा.

नवीन शुभारंभ केल्लो “गोवा अमृतकुंभ म्होंवा उत्पादन” ब्रॅण्ड शंभर टक्के गोंयचे उत्पादन आसून खण वेवसाय प्रभावीत वाठारांतल्या शेतकारांच्या प्रयत्नांतल्या तयार जाल्लो आसा. जिल्हो मिनरल फाऊंडेशन ह्या प्रकल्पा खाला खण वेवसाय प्रभावीत वाठारांतल्या आनीक 40 शेतकारांक म्होंवामूस पोसपाचे प्रशिक्षण दितले. ह्या प्रशिक्षणाचो लाव घेवपा खातीर उत्तर गोंयांतल्या खण वेवसाय प्रभावीत वाठारांतल्या शेतकारांनी नांवनोंदणी करपा खातीर उत्तर गोंय जिल्हो मिनरल फाऊंडेशनाच्या कार्यालयांत संपर्क करचो. तशेंच चड म्हायती खातीर फाऊंडेशनाच्या dmf.goa.gov.in ह्या वेबसायटीचेर भेट दिवपाक शकता.

ह्या वेळार बार्देस म्होंवामूस पालन संस्थेची सचीव श्रीमती मेधा मोन्तेरो हांणी म्होंवामूस पोसपाच्या वेवसायाची म्हायती दिली. सुरवातीक मिनरल फाऊंडेशनाचे सीईओ डॉ. सचीन तेंडूळकर हांणी मानेस्तांक येवकार दिलो.

म्हा /सप/ / विगां/ 2026/343