कुंकळ्ळी बंडाच्या महानायकांक श्रद्धांजली ओपली

ता. 15 जुलय 2026

समाज कल्यण मंत्री श्री. सुभाष फळदेसाय हांणी विरोधी पक्ष फुडारी श्री. युरी आलेमांव हांच्या सांगातान आयज कुंकळ्ळी बंडाच्या महानायकांच्या स्मारकाचेर पुष्पचक्र अर्पण करून कुंकळ्ळी बंडाच्या महानायकांक श्रद्धांजली ओपली.

ह्या वेळार उलयतना श्री. फळदेसाय हांणी परकीय सत्तेआडच्या कुंकळ्ळीच्या बंडाक गोंय मुक्ती चळवळीच्या इतिहासात व्हड म्हत्व आसून ह्या बंडातल्यान लोकांक परकीय सत्तेआड लढपाक स्फुर्त मेळ्ळी, अशें सांगलें.

कुंकळ्ळीच्या 16 महानायकांनी पोर्तुगीज सत्तेआड बंड करून हौतात्म्य पत्करले. आयज तांच्या उगडासाक आर्गां ओपपाक सरकारी यंत्रणां सयत स्वातंत्र्य सैनिक, विद्यार्थी आनी कुंकळ्ळीचे नगरिक उपस्थित आसात ही अभिमानाची गजाल आसा. 1583 वर्सा जाल्लो इतिहासीक कुंकळ्ळीचो हो परकीय सत्तेआड जाल्लो पयलो विरोध जावन आसा. ह्या बंडाच्या इतिहासातल्यान नवीन पिळग्यांक प्रेरणा मेळचे खातीर ह्या बंडाचो इतिहास एनिमेशन फिल्मात उपलब्ध करपाची गरज आसा, अशें तांणी सांगलें.

कुंकळ्ळी बंडाच्या महानायकांक श्रद्धांजली ओपपाक राष्ट्रीय पांवड्याचेर नवी दिल्लीत राष्ट्रीय स्मारकाच्या थळार कार्यक्रम आयोजीत करपाक सुरवात केल्ले खातीर आनी कुंकळ्ळी बंडाचो इतिहास सरकारान शालेय पाठ्यपुस्तकांत आस्पाव केल्ले खातीर समाधान व्यक्त करून मुख्यमंत्री डॉ. प्रमोद सावंत हांच्या प्रयत्नांची तोखणाय केली.

विरोधी फुडारी श्री. युरी आलेमांव हांणी कुंकळ्ळीचो बंड हो परकीय सत्तेआड केल्लो आशियातलो पयलो बंड आशिल्ल्याचो सांगून ह्या बंडाचो इतिहास सरकारान 9 वी आनी 11 वी इयत्तेच्या शालेय पाठ्यपुस्तकांत आस्पाव केल्ले खातीर समाधान व्यक्त केले आनी कुंकळ्ळी चिफटेन्स मेमोरियल ट्रस्टान सुरू केल्ल्या उपक्रमांची तोखणाय केली.

स्वातंत्र्य सैनिक संघटनेचे अध्यक्ष श्री. रोहिदास देसाय, कुंकळ्ळी चिफटेन्स मेमोरियल ट्रस्टाचे अध्यक्ष श्री. ऑस्कर मार्टिन, अतिरिक्त जिल्हाधिकारी श्री. रमेश गांवकार, पुलीस अधिक्षक टिकम सिंग वर्मा, गृह खात्याचे जोड सचीव श्री. तुषार हळर्णकर आनी हेर मानेस्त कार्यक्रमाक उपस्थित आसिल्लें.

ह्या वेळार मानेस्तांच्या हस्तुकीं समाजा खातीर योगदान दिल्ले बद्दल निवृत्त पुलीस अधिक्षक संतोष देसाय आनी दिलीप देसाय हांका कुंकळ्ळी श्री पुरस्कार, शिक्षण क्षेत्रातल्या योगदाना खातीर राजीव देसाय, साईराज देसाय आनी एल्बा नोरोन्हा हांका कुंकळ्ळी ज्योती पुरस्कार आनी दर्शन वठवणकर हांका कुंकळ्ळी मित्र पुरस्कार भेटोवन तांचो सन्मान केलो.

बाल भवन आनी कुंकळ्ळी युनायटेड हायर सेकंडरीच्या विद्यार्थ्यांनी येवकार गीत आनी देशभक्ती गीतां सादर केली.

विजय कुमार कोपरे हांणी कार्यक्रमाचे सुत्रसंचालन केले.

म्हा /सप/ / विगां/ 2026/465