राज्यपालाकडल्यान गोंयच्या लोकांक स्वातंत्र्य दिसानिमतान परबीं

ता. 14 ऑगस्ट 2025

राज्यपाल श्री. पुसापती अशोक गजपती राजू हांणी गोंयच्या लोकांक भारतीय स्वातंत्र्य दिसाची परबीं भेटयल्या. राज्यपाल आपल्या संदेशात म्हणटा, आमच्या मातृभूमीच्या स्वातंत्रतायेच्या ह्या इतिहासीक आनी शुभ प्रसंगार समस्त गोंयकारांक म्हजी मनाकाळजासावन उर्बेभरीत परबीं आनी शुभकामनां भेटोवपाक म्हाका आनंद जाता. आयज आमी आमच्या स्वातंत्र्य सैनिकांनी भारतीय राष्ट्रीय चळवळीच्या काळात केल्ल्या त्यागाचो व्हडा आदरान उगडास करतात. परकीय राजवटी पासून आमकां मोलादीक स्वातंत्र्य मेळोवन दिल्ले खातीर आमी तांकां आदराच्या भावनेन नमन करतात. तांचे धाडस आनी वचनबद्दतायेक लागून आयज भारत ही जगातली व्हड लोकशाय जाल्ली आसा.

देशांत तशेंच विदेशांत भारतीय लोक ध्वजारोहण सुवाळ्यांनी सहभागी जावन, देशभक्ती गीतां गावन आनी मिठाय वांटून व्हडा अभिमानान 15 ऑगस्ट मनयतात. ल्हान भुरगीं स्वातंत्र्य आनी एकजूटीची भावना अंतर्भूत करपी सांस्कृतीक कार्यक्रमांनी उमेदीन भाग घेतात.

आमी आमच्या प्रिय तिरंग्या खाला उबें रावन आमच्या स्वातंत्रताये खातीर आपल्या जीणेचो त्याग केल्ल्या म्हान दादले आनी बायलांचो उगडास करतात. महात्मा गांधी, पंडित जवाहरलाल नेहरू, सरदार वल्लभभाई पटेल, नेताजी सुभाषचंद्र बोस, डॉ. बाबासाहेब आंबेडकर अशें फुडारीं आनी जांची नावां इतिहासात नोंद ना अशां अगणीत लोकांनी आपल्या निसुवार्थ कृती वरवीं आमच्या नशीबाक आकार दिलो.

ह्या किर्तवंत दिसा आमच्या देशाचे स्वातंत्र्य, एकजूट आनी अखंडताये खातीर म्हान त्याग केल्ले स्वातंत्र्य सैनिक आनी हुतात्म्यांक आमी नमन करूया. तशेंच आमची सैन्य दळां, पुलीस आनी नागरी सेवेतल्या शूर दादले आनी बायलांप्रती आमी आदर व्यक्त करूया, जांणी आपल्या जीवाची पर्वा करीनासतना आमच्या देशाची एकजूट आनी अखंडताय सतत राखून दवरली. तांची समर्पितताय आनी त्याग आमकां देशाच्या उदरगतीक योगदान दिवपाक प्रेरणा दिता.

गोंयच्या लोकांबाबतीत स्वातंत्र्य दिसाक खास म्हत्व आसा. उर्वरीत भारताक 1947 वर्सा स्वातंत्र्य मेळ्ळे आसले तरी आमची स्वताची चळवळ चालू आशिल्ली. मातृभूमीक सामील जावपाचे सपन पुराय जावपाक गोंयच्या लोकांक चौदा वर्सा वाट पळोवची पडली. हे सपन 19 डिसेंबर 1961 दिसा पुराय जाले, जेन्ना गोंय मुक्त जाले आनी अभिमानान भारत देशाचो भाग जालो. हे आमकां सांगता की स्वातंत्र्याक कळाव जावपाक शकता, पुण जेन्ना लोकांची एकजूट आसता तेन्ना ते नकारपाक शकना.

स्वातंत्र्य मेळत सावन भारतान प्रत्येक क्षेत्रांत तोखणायेची प्रगती केल्या- चंद्रयान-3 सारखे अंतरिक्ष मिशन यशस्वी करपा सावन ते जगातली चौथी व्हड अर्थवेवस्था जावप. आमी आयटी, फार्मास्युटिकल, विज्ञान, उद्देग, कृशी, तंत्रज्ञान आनी संरक्षण मळार जागतीक लिडर आसात. आमची लोकशाय मजबूत आसा, आमची युवा पिळगी इनोव्हेटिव आसा आनी आमच्या आवाजाक जागतीक मंचार आदर वाडिल्लो आसा. आमी आमच्या भुतकाळा पासून प्रेरणा घेतना, आमी सध्याच्या युगात मेहनत आनी सतर्कतायेन काम करपाक जाय आनी भविश्याकडेन वाटचाल करपाक जाय, जेणे करून आमी एकजूट, इनोव्हेशन आनी आस्पावित उदरगती सयत भारताक 2047 मेरेन “विकसीत भारत” करपाक शकतले.

गोंय हे ल्हान राज्य आसले तरी गोंय राज्याक सांस्कृतीक, इतिहासीक, अर्थीक आनी सैमीक दायजाचे म्हत्व आसा. सोबीत दर्यावेळों, समृध्द वारसो आनी सैमीक सोबीतकाये खातीर फामाद आशिल्ल्या गोंयांत दर वर्सा संवसार भरांतले लाखांनी पर्यटक येतात. गोंयच्या पुर्वेकडल्या शीम वाठाराक लागून आशिल्लो अस्तंत घाट जैविक विविधतायेन समृध्द आसा. आमी केल्ल्या आमच्या प्रगतीचेर खुशालकाय मनयतनाच आमी फाटल्या नांवलौकीकाचेर समाधानी रावनासतना आमची अर्थीक भरभराट फुडें व्हरपाक कटीबद्द जावपाक जाय.

फाटल्या कांय दशकांत गोंयान शिक्षण, भलायकी आनी साधनसुविधांच्या क्षेत्रांत तोखणायेची प्रगती केल्ली आसा. आयज गोंय “कर्तव्य काल” तत्वांक आपणावन भारतीय संविधानाखाला स्थापीत मजबूत वेवस्थेचो लाव घेता आनी विकसीत, समृध्द आनी आस्पावीत विकसीत भारताचे व्हिजन साकार करपाक योगदान दिता.

गोंय हे एक ल्हान राज्य, अर्थीक उदरगती सयत अदीक per capita income आशिल्लें भारतातले एक राज्य आसा. गोंयची शारां आनी ग्रामीण वाठार रस्ते येरादारी साधनसुविधांनी जोडिल्लें आसात. तशेंत गोंय रस्ते, रेल्वे, उदका मार्ग आनी हवाई मार्गान जोडिल्लें वेपार वेवसायाचे केंद्र आसा.

2020 सावन उपलब्ध केल्ल्या 19 NAAT मशीनावरवीं क्षयरोगाची मुळाव्या पांवड्याचेर तपासणी करपी गोंय हे देशांतले पयले राज्य आसा. लोकसंख्या, भलायकी आनी कुटुंब नियोजनाच्या उत्कृश्ट वावरा खातीर गोंय राज्याक 7 व्या जेआरडी टाटा मेमोरियल परिशदेत मान फावो जाला.

तशेंच गोंय हे पुराय साक्षर राज्य घोशीत केल्ले आसा. गोंय सरकार शिक्षण आनी विकासा खातीर कटीबद्द आसा. आयुषमान भारत डिजिटल मिशनाखाला नॅशनल हेल्थ ओथॉरिटीचो “100 Microsites Project” सुरू करपी गोंय हे एक राज्य आसा. ह्या प्रकल्पा खातीर राष्ट्रीय पांवड्यार गोंयची तोखणाय जाल्या.

राज्य अन्न सुरक्षा सुचीत ल्हान राज्यांच्या वर्गांत गोंय राज्याक सेगीत पाचव्या वर्सा पयले स्थान फावो जाल्ले आसा. राष्ट्रीय शिक्षण धोरण 2020 ची यशस्वी अंमलबजावणी करपा खातीर गोंय राज्य शालेय शिक्षण दर्जा परिक्षण आनी मान्यताय अधिकारीणीची स्थापना करपी गोंय हे पयले राज्य आसा. तशेंच गोंयात ISO- प्रमाणिकरण फावो जाल्लें कुशळटाय विकास आनी उद्देजकताय संचालनालय आसा. वेवसायिक प्रशिक्षणाचो दर्जो आनी इनोव्हेशना खातीर हो विभाग कटीबद्द आसा.

गोंय सरकारान दर्जेदार खेळां साधनसुविधां निर्माण करपाचेर भर दिल्लो आसून फुडारांत गोंय हे खेळां केंद्र म्हूण फुडें येतले. सरकारान सडा ते वरूणापूरीक जोडपी केबल स्टेड पूल आनी गोवा इंटरनॅशनल विमानतळ पुर्ण करून देशाच्या साधनसुविधांच्या प्रगतीत म्हत्वाची भर घातल्या.

NITI आयोगान जाहिर केल्ल्या शाश्वत विकास उद्दिश्ट सूची-2024 प्रमाण गोंय राज्यान आपले 4 थे स्थान राखला आनी “Front Runner” राज्याचो मानय कायम राखला.

ह्या स्वातंत्र्यतायेच्या दिसा आमी आमचे राज्य आनी देशाची एकजूट राखपाचो, उदरगती खातीर काम करपाचो आनी आमच्या म्हान स्वातंत्र्य सैनिकांचे सपन साकार करपी आनी आमचे लोक आनी युवकांच्यो अपेक्षां पुर्ण करपी विकसीत, आत्मनिर्भर आनी आस्पावीत भारत निर्माण करपाचो सोपूत घेवया, अशें राज्यपाल म्हणटा.

म्हा /सप/ / विगां/ 2025/688