देश आनी राज्याच्या विकासाखातीर लोकांनी एकजूट राखपाची गरज – श्री रवी नाईक

ता. 26 जानेवारी 2024

कृशी मंत्री श्री रवी नाईक हांणी देश आनी राज्याच्या सामाजिक आनी आर्थिक विकासा खातीर लोकांनी एकजूट राखपाची आनी संविधानान दिल्ल्यो जबाबदाऱ्यो निभावपाची गरज उक्तायली. कृशी मंत्री श्री रवी नाईक आयज फोंडेच्या क्रांती मैदानार आयोजीत प्रजासत्ताक दीस सुवाळ्यात राष्ट्रीय तिरंगो बावटो हुबयले उपरांत उलयताले.

भारतीय संविधानात देशाच्या प्रत्येक नागरिकाच्या कल्याणाची आनी विकासाची खात्री दिल्ली आसा. प्रत्येकांक समान हक्क दिल्ले आसा आनी अभिमानान जीण जगपाचो अधिकार आसा. लोकांनी देश आनी राज्याच्या विकास प्रक्रियेत सहभागी जावन आपले योगदान दिवपाची गरज आसा. आयज गोंय राज्यान विकासाच्या प्रत्येक मळार उत्कृश्ट प्रगती केल्ली आसा आनी प्रधानमंत्री श्री. नरेंद्र मोदी हांच्या फुडारपणाखालच्या केंद्र सरकाराकडल्या राज्याच्या विकासा खातीर भरपूर सहकार्य मेळटा, अशें श्री. नाईक हांणी सांगलें.

सुरूवातीक कृशीमंत्र्यांन क्रांती मैदानावयल्या हुतात्मा स्मारकाक फुलाहार अर्पण करून आदरांजली ओपली. श्री नाईक हांणी पुलीस पंगडाच्या संचलनाची पळोवणी करून मानवंदना दिली.

ह्या वेळार फोंडा वाठारांतल्या विविध शाळांच्या विद्यार्थ्यांनी देशभक्तीचेर गीतां सादर केली.

कार्यक्रमाक फोंडा नगरपालिकेचे नगराध्यक्ष श्री रितेश नाईक, अतिरिक्त जिल्हाधिकारी श्री विशाल कुंडईकर, उपजिल्हाधिकारी श्री उदय प्रभुदेसाय, , डीवायएसपी श्री आर्षी आदील,  कमांडिंग ऑफिसर 6 टीटीआर, लेफ्टनंट कर्नल हेमंत सोनी, आदले आमदार आनी स्वातंत्र्य सैनिक श्री. रोहिदास नाईक, स्वातंत्र्य सैनिक, सरकारी अधिकारी, शिक्षक, विद्यार्थी आनी नागरीक उपस्थित आशिल्लें.

श्री. गिरीश वेळगेकर हांणी कार्यक्रमाचे सूत्रसंचालन केले.

म्हा /सप/ प्रना/ विगां/ 2024/74