केंद्रीय राज्यमंत्र्या हस्तुकीं रोजगार मेळा उपक्रमाखाला नियुक्ती पत्रांचे वाटप

ता. 13 जून 2023

केंद्रीय पर्यटन, बंदरां, शिपिंग आनी उदकामार्ग राज्यमंत्री श्री. श्रीपाद नाईक हांणी आयज इन्स्टिट्यूट मिनेझिस ब्रागांझा सभाघर, पणजी हांगा आयोजीत कार्यक्रमात केंद्र सरकाराच्या 6 व्या रोजगार मेळा उपक्रमांखाला सरकारी नोकऱ्यांनी नव्यान नियुक्त जाल्ल्या 126 उमेदवारांक नियुक्ती पत्रांचे वाटप केले. केंद्र सरकाराच्या भरती प्रक्रियेचो एक भाग म्हूण रोजगार मेळा उपक्रमांखाला देशभर सरकारी नोकऱ्यांनी उमेदवारांची भरती करपात येता. प्रधानमंत्री श्री. नरेंद्र मोदी हांणी सरकारी नोकऱ्यांनी नव्यान नियुक्त जाल्ल्या उमेदवरांक व्हिडीओ कॉन्फरन्सिंग वरवीं संबोधित केले.

रोजगार अभियान हो पारदर्शकता आनी सुशासनाचो पुरावो आशिल्ल्याचें सांगून प्रधानमंत्री श्री. मोदी हांणी नवीन भरती जाल्ल्या उमेदवारांक देशांतल्या नागरिकांप्रती संवेदनशीलपणान काम करपाक आनी नवीन शिकत रावपाक सांगलें. अमृत काळाच्या 25 व्या वर्सांत विकसित भारताचे सपन साकार करपाच्या दिकेन वाटचाल करची, अशेंय तांणी सांगलें.

सरकारी नोकऱ्यांनी नवीन नियुक्ती जाल्ले उमेदवार राष्ट्र उभारणीच्या वावरांत मोलादीक भूमिका निभावतले अशी अपेक्षा आसा. देशांत उद्येगीक, अर्थिक आनी समाजीक मळार पायाभूत सुविधा मजबूत करपाच्या कार्यात तांचो सहभाग आसतलो, अशें केंद्रीय मंत्री श्री. श्रीपाद नाईक हांणी म्हणलें. अमृत काळाच्या फुडल्या 25 वर्सांतली तांची सेवा नव भारत-विकसित भारताची बुन्याद मजबूत करपा खातीर उपेगी थारतली, अशेंय तांणी म्हणलें.

गोंयांत स्टेट बँक ऑफ इंडिया (64 उमेदवार), बँक ऑफ महाराष्ट्र (14 उमेदवार), रेल्वे (30 उमेदवार), कस्टम (8 उमेदवार) आनी केंद्रीय वस्तू आनी सेवा कर विभाग (8 उमेदवार) नियुक्ती पत्रां भेटयली. तशेंच केंद्रीय कामगार मंत्रालय आनी संरक्षण मंत्रालयान प्रत्येकी एका उमेदवाराची नियुक्त केली.

ह्या कार्यक्रमाक स्टेट बँक ऑफ इंडियाचे मुख्य महावेवस्थापक अरविंद कुमार सिंग, स्टेट बँक ऑफ इंडियाचे उपमहावेवस्थापक श्री विकास बासुमातरी, के. एम नंदकुमार उपस्थित आशिल्लें.

रोजगार मेळा उपक्रमाखाला आयज प्रधानमंत्री श्री नरेंद्र मोदी हांणी पुराय भारतातल्या सरकारी विभाग आनी संस्थांनी नव्यान भरती जाल्ल्या सुमार 70,000 उमेदवारांक नियुक्ती पत्रांचे वाटप केले. देशभरात 43 कडेन रोजगार मेळ्याचे आयोजन केल्ले. केंद्र सरकाराचे साबार विभाग तशेंच राज्य आनी संघप्रदेश सरकारांकडल्यान ह्या भरती उपक्रमाक सहकार्य मेळटा.

म्हा /सप/ प्रना/ विगां/ 2023/495