स्वातंत्र्य दिसानिमतान राज्यपालांचो संदेश

ता. 14 ऑगस्ट 2026

गोंयचे राज्यपाल श्री. पुसापती अशोक गजपती राजू हांणी भारतीय स्वातंत्र्य दिसानिमतान गोंयच्या लोकांक परबीं दिल्या. राज्यपाल आपल्या संदेशात म्हणटा, आमच्या मातृभूमीच्या 80 व्या स्वातंत्रताय दिसाच्या ह्या कीर्तवंत आनी शुभ प्रसंगार हांव गोंयच्या लोकांक, देशभरातल्या आमच्या मोगाळ नागरिकांक आनी विदेशांत रावपी सगळ्यां भारतीयांक म्हजी मनाकाळजासावन उर्बेभरीत परबीं भेटयता.

आयज, आमी अभिमानान स्वातंत्रतायेची खुशालकाय मनयतात, जे 15 ऑगस्ट 1947 दिसा आमच्या म्हान राष्ट्राक मेळ्ळे. ह्या पवित्र प्रसंगार, आमी आमच्या स्वातंत्र्य सैनिकांनी केल्ल्या म्हान त्यागाचो खऱ्या कृतज्ञतायेच्या भावनेन उगडास करतात, जांणी आपली जीण आमच्या मायभूंयेच्या स्वातंत्रताये खातीर समर्पित केली. महात्मा गांधी, नेताजी सुभाषचंद्र बोस, सरदार वल्लभभाई पटेल, पंडित जवाहरलाल नेहरू, भगत सिंग आनी अगणीत ज्ञात-अज्ञात शूर-वीरांक आमी आमची आदरांजली ओपतात, जांचे धाडस, त्याग आनी वचनबद्दतायेतल्यान देशाक आपल्या स्वातंत्रताये खातीरच्या चळवळीक प्रेरणा मेळ्ळी.

आयज जे स्वातंत्र्य आमी भोगतात, ते दशकांच्या चळवळीवरवीं, त्याग आनी निर्धारावरवीं मेळयिल्ले आसा. आमचे स्वातंत्र्य सैनिक सार्वभौम, लोकशाय, आस्पावीत आनी न्याय भारताची सपनां पयळताले. व्हडा कश्टांनी मेळयिल्ले हे स्वातंत्र्य सांबाळून दवरप आनी मजबूत, भरभराटी आनी संधटीत भारताचे तांचे सपन पुराय करपाक काम करप ही आमची सगळ्यांची जापसालदारकी आसा.

स्वातंत्र्य दीस मनोवप म्हणजे न्हय फकत आमच्या भूतकाळाचो उगडास करप, जाल्यार ह्या प्रसंगार आमी आमच्या भविश्याखातीर आमची जापसालदारकी दाखोवन दिवपाक जाय. आमच्या संविधानातल्या आदर्शांकडेन आमी वचनबद्द रावपाक जाय आनी विकसीत, आत्मनिर्भर, आस्पावीत आनी मायेस्त भारत निर्माण करपा खातीर योगदान दिवपाक जाय.

भारत देश आयज विस्वासान आनी निर्धारान फुडें वाटचाल करता. विज्ञान आनी तंत्रज्ञान, अंतरीक्ष सोद, डिजिटल इनोव्हेशन, साधनसुविधा, शिक्षण, भलायकी सेवा, शेती आनी हेर क्षेत्रांतल्या आमच्या उदरगती वरवीं जागतिक मळार आमचे स्थान मजबूत जाला. विकसीत भारताचे व्हिजन प्रत्येक नागरिकाक राष्ट्र निर्माणाच्या प्रक्रियेंत सक्रिय वाटेकार जावपाचो उलो मारता.

गोंय , जरी देशांतले एक ल्हान राज्य आसले तरी, गोंयांन सदाच आपल्या आकारा परस चड योगदान दिला. आमचे राज्य आपले समृध्द सांस्कृतीक दायज, सैमिक सोबीतकाय, शिक्षणीक संस्थां, पर्यटन, उद्देजकताय आनी सामाजीक सलोख्या खातीर फामाद आसा. देशाच्या अर्थिक आनी सामाजीक प्रगतीक गोंय सतत योगदान दित आसा.

गोंय मुक्ती खातीरच्या इतिहासीक चळवळीचोय आमी अभिमानान उगडास करतात. स्वातंत्र्य सैनिक आनी गोंयच्या लोकांचो त्याग आनी निर्धाराक लागून 19 डिसेंबर 1961 दिसा गोंय स्वतंत्र जालें. तांचे धाडस, देशभक्ती आनी वचनबद्दता येणाऱ्या पिळग्यांक प्रेरणास्त्रोत आसतले.

गोंयान विविध क्षेत्रांत म्हत्वाची प्रगती केल्ली आसा आनी उदरगत आनी मानव कल्याणाच्या दिकेन नेटान पावलां मारीत आसा. सेवाभाव आनी सामाजीक सहभागाचे हालीचेच एक उदाहरण म्हणजे, देशाचे मानादीक प्रधानमंत्री श्री. नरेंद्र मोदीजी हांणी आपल्या मन की बात कार्यक्रमात काणकोणचे निवृत्त शिक्षक श्री. बाळकृष्ण अय्या हांणी आपल्या स्वताच्या कश्टांतल्यान गांवच्या कुटुंबांची पिवपाच्या उदकाची गरज पुर्ण केल्ले खातीर तांच्या प्रयत्नांची तोखणाय केल्ली आसा. स्वताची वचनबद्दता आनी सामाजीक सहभागातल्यान समाजाच्या कल्याणा खातीर कशें तरेन अर्थपुर्ण योगदान दिवपाक जाता, हे तांच्या निसुवार्थ प्रयत्नांतल्यान दाखोवन दिला.

गोंय हे गुंतवणूक आनी उद्देजकतायेचे आकर्शीत केंद्र म्हूण आपले स्थान मजबूत करपा खातीर सतत प्रयत्न करता. NITI आयोगान जाहिर केल्ल्या अहवाला प्रमाण गुंतवणूक पूरक सूची 2026 त पयल्या पाच राज्यांमदी गोंय राज्यान आपले 4 थे स्थान राखला. ह्या देखीतल्यान राज्यान गुंतवणूकी खातीर पोशक वातावरण, उद्देजकतायेक प्रोत्साहन आनी रोजगारा खातीर नवीन संदी निर्माण करपा खातीर केल्ले प्रयत्न दिसून येतात. जापसालदार आनी शाश्वत गुंतवणूकीक आकर्शीत करपा खातीर आमचे प्रयत्न आसपाक जाय, जी थळावी अर्थवेवस्था मजबूत करतली आनी गोंयच्या सर्वांगी समाजीक-अर्थिक विकासाक योगदान दितली.

आमचे युवक आमचो देश आनी आमच्या राज्याची व्हड ताकद आनी भविश्य जावन आसा. हांव आमच्या युवकांकडेन मागता, की तांणी आमची समृध्द संस्कृती आनी नैतिक मुल्यांकडेन बांदिल रावन व्हड सपना पळोवची, गुणवत्ता मेळोवची आनी ज्ञान आत्मसात करचे, इनोव्हेशन आनी तंत्रज्ञानात प्रगती करची. तांची कुशळटाय, ताकद आनी सर्जनशीलताय समाजा खातीर आनी मजबूत, भरभराटीचो आनी विकसीत भारत निर्माण करपा खातीर अर्थपुर्णरीत्या योगदान दिवपाक शकतली.

विकासाचे फायदे समाजातल्या प्रत्येक घटका मेरेन पावतले हाची आमी खात्री दिवपाक जाय. महिलां, भुरगीं, ज्येश्ठ नागरिक आनी अर्थिक आनी समाजीकरित्या दुबळ्या घटकांचे कल्याण आनी सशक्तीकरणाक आमचे प्राधान्य आसपाक जाय. उदरगती वांगडाच सगळ्यां खातीर मानसन्मान, समानताय, सामाजीक न्याय आनी समान संदी आसतल्यो तोच एक खरो विकसीत समाज आसतलो.

पर्यावरणाचो सांबाळ हो आनीक एक वाठार, जाचे कडेन आमी सगळ्यांनी एकवटान लक्ष दिवपाची गरज आसा. गोंयची रानां, न्हंयो, दर्यावेळो, पाणथळ वाठार आनी जैवविविधताय आमचे समृध्द सैमिक दायज आसा. विकास आनी पर्यावरणीय शाश्वततायेचो समतोल राखपाक जाय. हांव प्रत्येक नागरिकाक उलो मारता की, तांणी जापसालदार आनी शाश्वत कृतीचो स्विकार करचो आनी गोंयचे पर्यावरण फुडल्या पिळग्यांखातीर सांबाळून दवरपाक हातभार लावचो.

भारताची ताकद ही ताच्या विविधतायेतल्या एकजूटीत आसा. गोंयान आपली संस्कृती, भाशां, परंपरां आनी सामुदायिक सलोख्याच्या ताळमेळातल्यान ही भावना सोबीत तरेन दाखोवन दिल्या. जातीय सलोखो, परस्पर आदर आनी शांतीकायेतल्यान ही भावना आमी राखून दवरूया, जी आमची व्हड ताकद जावन आसा.

ह्या स्वातंत्रतायेच्या दिसा आमी आमच्या देशाचे सार्वभौमत्व, एकजूट आनी अखंडताय सांबाळून दवरपाच्या आमच्या कर्तव्याकडेन पुर्नसमर्पित जावया. जापसालदार नागरिक म्हूण आमी आमचे कर्तव्य निभावया, कायद्याच्या नेमांचो आदर करूया, भौशीक मालमत्तेची राखण करूया, आमच्या सैमाचो सांबाळ करूया आनी गरजेवंतांक दया दाखोवन मजत करूया.

गोंय हे भरभराटीचे, शांतिकायेचे, शाश्वत आनी आस्पावीत राज्य निर्माण करपा खातीर गोंयच्या लोकांनी समर्पित आनी सेवा भावनेन एकवटान काम करपाचो आनी मजबूत, विकसीत आनी आत्मनिर्भर भारत निर्माण करपा खातीर योगदान दिवपाचो हांव उलो मारता.

राष्ट्र निर्माणाचे काम हे न्हय एकट्या सरकाराची जापसालदारकी हे आमी लक्षात दवरपाक जाय. प्रत्येक नागरिकान म्हत्वाची भुमीका निभावपाक जाय. जापसालदारकी, प्रामाणिकता, शिस्त आनी सेवेचे आमचे ल्हान काम जेन्ना समाजभर गुणाकार जाता तेन्ना परिवर्तन बदल हाडपाक शकता.

आमच्या स्वातंत्रतायेचे 80 वे वर्स मनयतना आमी विश्वासान, अपेक्षा आनी निर्धारान भविश्या कडेन पळेवया. आमच्या स्वातंत्र्य सैनिकांच्या सपनातलो भारत निर्माण करून तांच्या त्यागाचो सन्मान करूया आनी येणाऱ्या पिळग्यांखातीर मजबूत आनी अदीक भरभराटीच्या भारताची देणगी भेटोवया.

आमचो तिरंगो सदाच उंच हुबत राव आनी आमकां आमच्या राष्ट्राप्रतीच्या बांदिलकी कडेन एकजूट रावपाक प्रेरणा मेळू, अशें राज्यपालान आपल्या संदेशात म्हणला.

म्हा /सप/ / विगां/ 2026/526