संशोधन आनी शाश्वत मत्स्यवेवसाय मजबूत करपा खातीर गोंय विद्यापीठ आनी नुस्तेमारी वेवसाय संचालनालयामदी समजीकाय कबलात

“स्वयंपूर्ण गोंयचे उद्दीश्ट साकार करपाच्या दिकेन नुस्तेमारी वेवसाय क्षेत्राक मजबूत करपाचे एक महत्त्वाचे पावल -मुख्यमंत्री डॉ. प्रमोद सावंत

ता. 10 ऑगस्ट 2026

वैज्ञानिक संशोधनाक उर्बा दिवपा खातीर आनी शाश्वत मत्स्यवेवसाय विकासाक प्रोत्साहन दिवपा खातीर, गोंय विद्यापीठ आनी गोंय सरकारच्या नुस्तेमारी वेवसाय संचालनालयान आयज गोंय विद्यापीठात ‘मत्स्य संधान क्षेत्रम’ कार्यक्रमां खाला समजीकाय कबलाचीर सय केली. ज्ञान-आधारित उपक्रम आनी तंत्रज्ञानाच्या माध्यमातल्यान संशोधन मजबूत करप, नवीन उपक्रम आनी कुशळटाय विकासाक प्रोत्साहन दिवप, तशेंच गोंयच्या नुस्तेमारी वेवसाय समाजाक उत्कृश्ट संदी निर्माण करप हो कबलातीचो उद्देश आसा.

ह्या वेळार उलयतना मुख्यमंत्री डॉ. प्रमोद सावंत हांणी सांगलें “नुस्तेमारी वेवसाय क्षेत्र हे गोंयच्या सामाजिक, सांस्कृतिक आनी आर्थिक जडणघडणीचो अविभाज्य भाग आसून, अन्नसुरक्षा सुनिश्चित करपात आनी उपजिविकेक आदार दिवपाची म्हत्त्वाची भूमिका निभायता.” गोंय विद्यापीठ आनी नुस्तेमारी वेवसाय संचालनालय हांच्या भागीदारीची तोखणाय करतना तांणी सांगलें, ह्या कबलातीक लागून नुस्तेमारी वेवसाय क्षेत्रात संशोधन, नवीन उपक्रम, कुशळटाय विकास आनी शाश्वत उदरगतीच्या वाडीक उर्बा मेळटली. गोंयचो पारंपरिक नुस्तेमारी वेवसाय आनी सांस्कृतिक वारसो सांबाळून दवरपाक थळाव्या तरणाट्यांनी आनी नुस्तेमारी करप्यांनी योगदान दिवचे अशें आवाहन तांणी केले.

शिक्षण संस्था आनी सरकार हांच्या मदले सहकार्य वाडोवपाच्या उद्देशान ह्या वेळार ‘मत्स्य संधान क्षेत्रम’ ॲपचे अनावरणय जाले. हे ॲप नुस्तेमारी क्षेत्र मार्गदर्शन, उपग्रह निरीक्षण, दर्यातल्या हवामानाची म्हायती आनी हेर प्रगत डेटाचो वापर करून नुस्तेमारांक वैज्ञानिक मार्गदर्शन दिवपाक मजत जातली.

ज्ञान-आधारित आनी शाश्वत नील अर्थवेवस्थेक चालना दिवपी हो उपक्रम, नुस्तेमारी वेवसाय क्षेत्राखातीर वेव्हारीक, तंत्रज्ञान-आधारित उपाय विकसित करपाच्या शैक्षणीक संस्था आनी सरकारी खात्यामदल्या सहकार्याची क्षमता दाखोवन दिता. ही भागीदारी सागरी संसाधनांच्या जबाबदार आनी कार्यक्षम वापराक प्रोत्साहन दिवपा वांगडाच थळाव्या नुस्तेमारी समाजाक अदीक संदीय निर्माण करपाक फायदेशीर थारतली.

ह्या कार्यक्रमाक नुस्तेमारी वेवसाय मंत्री श्री नीळकंठ हळर्णकर, गोंय विद्यापीठाचे कुलगुरू प्रा. हरिलाल बी. मेनन; कुलसचीव श्री सुंदर एन. धुरी; गोंय राज्य संशोधन प्रतिष्ठानचे अध्यक्ष (GSRF) प्रा. जनार्दन; नुस्तेमारी वेवसाय संचालनालयाच्यो संचालक डॉ. शर्मिला मोंतेरो; गोंय विद्यापीठाच्या स्कूल ऑफ अर्थ, ओशन अँड ॲटमॉस्फेरिक सायन्सेस, विभागाचे डीन प्रा. अँथनी ए. व्हिएगास; सरकारी अधिकारी, गोंय विद्यापीठाचे प्रतिनिधी, आनी हेर मानेस्त उपस्थित आशिल्लें.

म्हा /सप/ / विगां/ 2026/509