मुख्यमंत्र्या हस्तुकीं रीणमाफी प्रमाणपत्रांचे वितरण

ता. 11 ऑगस्ट 2026

सरकार ‘बहुजन हिताय बहुजन सुखाय’ ह्या तत्त्वाचेर काम करता आनी सदाच सर्वसामान्यांच्या हिताचे रक्षण करता. गोंय राज्य अनुसूचित जाती आनी हेर मागासवर्ग वित्तीय उदरगत म्हामंडळा कडल्यान रीण घेतला, पुण ते फारीक करपाक शक्य जावंक नाशिल्ल्या आनी अनेक वर्सां सावन रीणाच्या वज्याखाला दबलेल्या लोकांक थाकाय दिवपा खातीर सरकारन रीणमाफ येवजण राबोवपाचो फुडाकार घेतला, अशें मुख्यमंत्री डॉ. प्रमोद सावंत हांणी आयज पणजे मिनेझीस ब्रागांझा सभाघरांत गोंय राज्य अनुसूचित जाती आनी हेर मागासवर्ग वित्तीय उदरगत म्हामंडळान आयोजीत रीणमाफी प्रमाणपत्र वितरण कार्यक्रमात उलयतना सांगलें.

मुख्यमंत्र्यान सांगलें, सरकारन वेवसाय सुरू करपाक अर्थिक मजत येवजण राबयिल्ली आसून ह्या येवजणे वरवीं ओबीसी, एससी आनी हेर समाजाचे अर्थिक सक्षमीकरण करपाचे प्रयत्न आसा. सरकार विविध सरकारी खात्यांमार्फत बहुजन समाजाच्या हिताखातीर विविध समाज कल्याणकारी येवजण्यांची अंमलबजावणी करता. अर्थिक अडचणीक तोंड दिवपी एससी, ओबीसी, दिव्यांगजन आनी सफाई कर्मचारी ह्या सारख्या उपेक्षीत घटकांक रीण थकबाकीदारांक थाकाय दिवप हो कर्जमाफी येवजणेचो उद्देश आसा. तांचे वयलो भार करपाच्या उद्देशान तांकां रीण फारीक करपाचे विविध पर्याय लेगीत उपलब्ध करून दिल्यात, अशेंय तांणी सांगलें.

फुडें उलयतना मुख्यमंत्र्यान बहुजन समाजातल्या विद्यार्थ्यांक विदेशात उच्च शिक्षण घेवपाक अर्थिक मजत करपा खातीर ‘मुख्यमंत्री बहुजन उत्कर्ष योजना’ नावाची आनीक एका कल्याणकारी येवजण जाहीर केली.

समाज कल्याण मंत्री श्री सुभाष फळदेसाय हांणी आपल्या उलोवपात सरकार समाजातल्या प्रत्येक घटकाच्या कल्याणा खातीर बांदिल आशिल्ल्याचे सांगलें. सरकार धोरण तयार करतना प्रत्येक घटकाचो विचार करता, जेणे करून विकासाच्या बाबतीत कोणूच फाटी उरचो ना. समाज कल्याण खाते समाजातळ्या दुबळ्या घटकांच्या सक्षमीकरण आनी विकासा खातीर विविध येवजण्यो राबयता. सरकारच्या रीणमाफी येवजणेक लागून रीणाचे वजे नक्कीच कमी जातले आनी रीणकारांक थाकाय मेळटली, अशें सांगून तांणी ह्या प्रयत्नांक सहकार्य केल्ले खातीर तांणी मुख्यमंत्र्यांची तोखणाय केली.

गोंय राज्य अनुसूचित जाती आनी हेर मागासवर्ग वित्तीय विकास म्हामंडळाचे अध्यक्ष श्री दयानंद मांद्रेकर हांणी आपल्या उलोवपात 490 लाभार्थ्यांक रीणातल्या मुक्त करपाक ही रीणमाफी येवजण राबोवपाक सरकारन सहकार्य केल्ले खातीर उपकार मानले.

ह्या वेळार मुख्यमंत्र्यांन लाभार्थ्यांक रीणमाफी प्रमाणपत्रां आनी गृह सुरक्षा येवजणेची मंजूरी पत्रां वितरित केली.

जलसंपदा मंत्री श्री सुभाष शिरोडकर, गोंय राज्य अनुसूचित जाती आनी हेर मागासवर्ग वित्तीय विकास म्हामंडळाचे वेवस्थापकीय संचालक श्री दीपेश प्रियोळकर, समाज कल्याण संचालक श्री दीपक देसाय, गोंय राज्य अनुसूचित जाती आनी हेर मागासवर्ग वित्तीय विकास म्हामंडळाच्या संचालक मंडळाचे वांगडी आनी हेर कार्यक्रमाक उपस्थित आशिल्लें.

म्हा /सप/ / विगां/ 2026/516