केपेच्या सरकारी म्हाविद्यालयांत नव्या शिक्षणीक सुविधांचे उक्तावण

ता. 9 जुलय 2026

समाज कल्याण मंत्री श्री. सुभाष फळदेसाय हांणी आयज केपेच्या सरकारी कला, विज्ञान आनी वाणिज्य म्हाविद्यालयांत संगणक विज्ञान प्रयोगशाळा, स्मार्ट बोर्डस् आनी म्हाविद्यालया खातीरच्या दोन बस गाडयांचे आमदार श्री. निलेश काब्राल हांच्या उपस्थितीत उक्तावण केले. दक्षीण गोंय जिल्हा मिनरल फांवडेशनाच्या अर्थीक पालवान वट्ट 81.60 लाख रूपया खर्च करून ह्यो सुविधा उपलब्ध केल्यात.

अतिरिक्त जिल्हाधिकारी श्री. रमेश गावकार, सहाय्यक जिल्हाधिकारी (प्रशिक्षणार्थी) महम्मद शौकत आझिम, उपजिल्हाधिकारी श्री. अमितेश शिरवयकर, गोंय मिनरल फांवडेशनाचे मुख्य कार्यकारी अधिकारी डॉ. सचीन तेंडुळकर आनी प्राचार्य डॉ. प्रविणा केरकर हांची ह्या वेळार उपस्थिती आसिल्ली.

ह्या वेळार उलयतना श्री. सुभाष फळदेसाय हांणी सांगलें, की संवसारात डिजिटल मळार नेटान नवीन नवीन संशोधन आनी बदल जायत आसा. आयज तंत्रज्ञानान जग जोडिल्ले आसा, संवसारात जावपी घडामोडिंची म्हायती एका बोटाचेर मेळप शक्य जाला आनी ताका लागून तंत्रज्ञानाच्या युगांत डिजिटल गिज्ञान म्हत्वाचे आसा. आयच्या दिसपट्टे जीणेत डिजिटल वेव्हार जाणा जावप आवश्यक जाला, तशेंच शिक्षण आनी हेर उदरगतीच्या मळार डिजिटल तंत्रज्ञान म्हत्वाचे आसा, अशेंय तांणी सांगलें.

आमदार श्री. निलेश काब्राल हांणी शिक्षण हे उदरगतीची बुन्याद आशिल्ल्याचें सांगून, विद्यार्थांक आधुनिक शिक्षणीक साधनसुविधा उपलब्ध करपाक सरकारी बांदील आसा, अशें सांगलें. तांणी विद्यार्थ्यांक नवीन शिक्षणीक सुविधांचो बरो उपेग करपाचोय सल्लो दिलो.

म्हा /सप/ / विगां/ 2026/451