मडगांवच्या लोहिया मैदानाचेर गोंय क्रांती दीस कार्यक्रम जालो

ता. 18 जून 2026

मडगांवच्या लोहिया मैदानाचेर आयज गोंय क्रांती दीस मनयलो. भौशीक बांदकाम मंत्री श्री. दिगंबर कामत हांणी गोंय मुक्ती खातीर आपल्या जीणेचो त्याग केल्ल्या स्वातंत्र्य सैनिक आनी हुतात्म्यांक आर्गां ओपली.

श्री. कामत हांणी इतिहासीक गोंय क्रांती दिसाचे म्हत्व सांगतना, 1946 वर्सा ह्याच दिसा राष्ट्रवादी फुडारी आनी स्वातंत्र्य सैनिक डॉ. राम मनोहर लोहिया हांणी पोर्तुगीज सत्तेआड लडपाखातीर गोंयच्या लोकांमदी मुक्ती चळवळीची किट पेटयली. स्वातंत्र्य सैनिक आनी गोंयच्या लोकांनी धाडस आनी त्यागाच्या भावनेन पोर्तुगीज सत्तेआड लढो दिलो आनी 19 डिसेंबर 1961 दिसा गोंय पोर्तुगीज राजवटीतल्यान मुक्त जालें.

आयच्या तरणाट्या पिळगेन स्वातंत्र्य सैनिकांनी गोंय मुक्ती खातीर केल्ल्या त्यागा पसून प्रेरणा घेवन देशभक्ती, एकजूट आनी राष्ट्रभावनेची मुल्यां उचलून धरपाची गरज तांणी व्यक्त केली.

प्रधानमंत्री श्री. नरेंद्र मोदी हांच्या फुडारपणाखाला भारत देश उदरगतीच्या प्रत्येक मळार नेटान पावलां मारीत आसा आनी प्रधानमंत्र्यांच्या पावलार पावल दवरून गोंयचे मुख्यमंत्री डॉ. प्रमोद सावंत हे लेगीत विकसीत गोंय 2037 चे उद्दीश्ट पुर्ण करपा खातीर प्रयत्न करता, अशेंय श्री. कामत हांणी सांगलें.

श्री. अविनाश शिरोडकर हांणी स्वातंत्र्य सैनिकांच्या भुरग्यांच्या कल्याणा खातीर सरकारा वतीन करपात येवपी वावराची तोखणाय केली.

आमदार श्री. आलेक्स रेजिनाल्ड लॉरेन्स, श्री. उल्हास तुयेंकर, दक्षीण गोंय जिल्हाधिकारी श्रीमती एग्ना क्लीटस आयएएस, पुलीस अधीक्षक श्री. टिकम सिंग वर्मा आयपीएस, आदले केंद्रीय मंत्री श्री. एदुआर्द फालेरो, स्वातंत्र्य सैनिक श्री. वसंत नाईक, विद्यार्थ्यी आनी नागरिक कार्यक्रमाक उपस्थित आशिल्लें.

म्हा /सप/ / विगां/ 2026/430