40व्या गोंय घटक राज्य दिसा राज्याच्या प्रगतीचो आनी अभिमानाचो सुवाळो विकसीत भारता खातीर विकसीत गोंय जावप म्हत्वाचे- उपराष्ट्रपती

ता. 30 मे 2026

भारताचे उपराष्ट्रपती श्री सी. पी. राधाकृष्णन हांच्या उपस्थितीत आयज पणजे कला अकादमीत 40वो गोंय घटक राज्य दीस सुवाळो व्हडा दबाजान मनयलो. घटक राज्याचो दर्जो मेळ्ळया उपरांतच्या चार दसकांच्या काळात राज्यान केल्ली तोखणायेची प्रगती, राज्याचो समृद्ध सांस्कृतिक वारसो आनी गोंयच्या प्रेरणादायी प्रवासाची साक्ष दिवपी ह्या सुवाळ्याक व्हडा संख्येन लोक उपस्थित आशिल्लें.

ह्या वेळार उलयतना उपराष्ट्रपती श्री सी. पी. राधाकृष्णन हांणी गोंय घटक राज्य दिसाच्या म्हत्वाच्या आनी इतिहासीक प्रसंगार गोंयांत उपराष्ट्रपती म्हूण आपली पयली भेट दिवपाक आपल्याक खुशालकाय जाता, अशें सांगलें. उपराष्ट्रपतीन आपल्या भाशणात गोंयची संस्कृती, वारसो आनी लोक जीणेची तोखणाय करून गोंयची प्राचीन देवळां, भव्य चर्ची आनी दायज परंपरांचो एक सुंदर मेळ आशिल्ल्याचो उल्लेख केलो.

देशाचे आदले संरक्षण मंत्री सर्गेस्त मनोहर पर्रीकर हांचे स्मरण करून तांणी गोंयच्या नेतृत्वाची प्रशंसा केली आनी राज्य सरकाराच्या पारदर्शक भरती प्रक्रिया, सर्वसमावेशक प्रशासन आनी शाश्वत विकासा खातीर सुरू केल्ल्या प्रयत्नांची तोखणाय केली. उदरगती वांगडाच राज्याची वळख सांबाळून दवरपा खातीर समतोल राखप म्हत्वाचे आशिल्ल्याचे सांगून उपराष्ट्रपतीन “विकसीत भारताचे उद्दीश्ट साध्य करपा खातीर विकसीत गोंय जावप आवश्यक आशिल्ल्याचे सांगलें, आनी त्या खातीर युवकांनी आपली सर्जनशीलता आनी कुशळटायेचो उपेग करपाक सांगलें. गोंयांत नील अर्थ वेवस्थे सारख्या मळार उदरगत करपाक भरपूर वाव आशिल्ल्याचे सांगून तांणी गोंयच्या मुक्ती खातीर आपल्या जीणेचो त्याग केल्ल्या सगळ्यांक आर्गां ओपली.

मुख्यमंत्री डॉ. प्रमोद सावंत हांणी गोंयच्या लोकांक 40व्या गोंय घचक राज्य दिसाची परबी भेटोवन ह्या सुवाळ्याक उपस्थित राविल्ले खातीर उपराष्ट्रपतींचे उपकार मानले. गोंयच्या स्वातंत्र्य सैनिकांच्या बलिदानाचे स्मरण करून, मुख्यमंत्र्यांन कुंकळ्ळीचो बंड आनी दीपाजी राणे हांच्या सारख्या क्रांतिकारक नेत्यांच्या योगदानाचो उल्लेख करून गोंयच्या मुक्ती लढ्याक योगदान दिल्ल्यांक आर्गां ओपली.

मुख्यमंत्री डॉ. सावंत हांणी गोंयचो मुक्ती लढो फकत गोंयकारांनीच न्हय जाल्यार ‘ऑपरेशन विजय’ मजगती गोंय मुक्ती खातीर एकवटीत जाल्ल्या देशभरातल्या देशभक्तांनीय बळकट केलो, अशें नमूद केले. गोंयांनी विविध मळार केल्ल्या उदरगतीचेर उजवाड घालतना मुख्यमंत्र्यान ‘स्वयंपूर्ण गोंय’ सारख्या उपक्रमां वरवीं आत्मनिर्भर आनी प्रगतीशील गोंय निर्माण करपाक सरकार कटिबद्ध आशिल्ल्याचें सांगलें. प्रशासन लोकांच्या दारामेरेन पावोवपाच्या प्रयत्नांचो एक भाग म्हूण, कुशावती, ह्या तिसऱ्या जिल्ह्याची निर्मिती केल्या, अशेंय तांणी सांगलें.

गोंयान फाटल्या चार दशकांच्या काळात केल्ल्या प्रेरणादायी उदरगत आनी परिवर्तनाचेर उजवाड घालपी खास म्हायतीपट ह्या वेळार प्रदर्शीत केलो. पद्मभूषण नामनेचे व्यंगचित्रकार मारिओ मिरांडा हांच्या उगडासाक टपाल तिकीट आनी विशेश मुखपृष्ठाचे प्रकाशन, तशेंच “गोवा इंजिनिअरिंग द नेक्स्ट एरा” नावाच्या कॉफी टेबल बुकाचे प्रकाशन ह्या वेळार जाले.

ह्या सुवाळ्यात गोंयच्या नामनेच्या ब्रँड्सचो सन्मान जालो. दूद उत्पादकांक गोपाल रत्न पुरस्कार भेटयले. तशेंच स्वयंपूर्ण गांव आनी स्वयंपूर्ण मित्रांचो सत्कार केलो. नवीन निवड जाल्ल्या कर्मचाऱ्यांक नियुक्तीपत्त्रां वितरित केली.

सुवाळ्याक गोंयचे राज्यपाल श्री पुसापती अशोक गजपती राजू, केंद्रीय ऊर्जा आनी नवीन नवीकरणीय ऊर्जा राज्यमंत्री श्री श्रीपाद नाईक, राज्यसभा खासदार श्री सदानंद शेट तनावडे, पर्यटन मंत्री श्री रोहन खंवटे, जलसंपदा मंत्री श्री सुभाष शिरोडकर, नुस्तेमारी मंत्री श्री नीळकंठ हळर्णकर, हेर आमदार, सरकारी अधिकारी, मानेस्त आनी नागरिक उपस्थित आशिल्लें.

म्हा /सप/ / विगां/ 2026/383