डिजिटल भारता खातीर सायबर सुरक्षा यंत्रणा मजबूत करपा खातीर CERT-IN संवाद 2026 चे आयोजन

ता. 27 एप्रिल 2026

CERT-In एमपॅनल्ड ऑडिटिंग संस्थांची तीन दिसांची वर्सुकीं परिशद, ‘संवाद 2026’, आयज बिट्स पिलानीच्या के.के. बिर्ला गोंय कॅम्पसात सुरू जाली. ही परिशद 29 एप्रिल मेरेन चलतली. ह्या परिशदेंत भारत आनी हेर देशांतले मेळून 500 परस चड प्रतिनिधी सहभागी जाल्यात. “फ्युचर रेडी ऑडिट वरवीं डिजिटल भारताक सुरक्षित करप: अनुकूलीत, खात्री, प्रगती” ह्या संकल्पनेचेर आदारीत ह्या परिशदेचो उद्देश, सहकार्य, नावीन्य आनी दूरदर्शी ऑडिट कार्यपद्दतीच्या माध्यमातल्यान भारताची सायबर सुरक्षा यंत्रणां मजबूत करप हो आसा.

ह्या कार्यक्रमात सायबर सुरक्षा क्षेत्रातल्या अनेक म्हत्त्वाच्या उपक्रमांचो, जशें ब्लॉकचेन-सक्षम सायबर सुरक्षा ऑडिट प्लॅटफॉर्म आशिल्ल्या ‘अंबॅक’ (AMBAK) चो शुभारंभ, ऑडिट फ्रेमवर्क कार्यगटाच्या प्रगती अहवालाचे सादरीकरण जाले. CERT-In न नाबार्ड (NABARD) आनी बर्ड (BIRD) हांच्या सहकार्यान सुरू केल्ल्या प्रगत सायबरसुरक्षा प्रमाणपत्र अभ्यासक्रम, कुशळटाय विकास आनी संस्थात्मक क्षमतावाडीच्या उपक्रमाचो शुभारंभ जालो.

ह्या वेळार उपस्थितांक संबोदीत करतना मुख्यमंत्री डॉ. प्रमोद सावंत हांणी सांगलें, की, जरी गोंयची पयली पसून ‘सन, सॅण्ड आनी सी’ ह्या खातीर वळख आसली तरी आता गोंय सायबर सुरक्षेचे केंद्र म्हूण फुडें येता. देश आनी जगभरांतल्यान प्रतिनिधी फकत गोंयच्या सैमाच्या आकर्शणा खातीरच न्हय जाल्यार डिजिटल भविश्य सुरक्षित करपाक म्हत्वाच्या विशयांचेर चर्चा करपाक हांगा जमिल्लें आसात. प्रधानमंत्री श्री. नरेंद्र मोदी हांच्या ‘डिजिटल इंडिया’ ह्या संकल्पने प्रमाण सुरक्षित डिजिटल प्रणालींच्या म्हत्त्वाचेर भर दिवपा वांगडाच अशां कार्यक्रमाच्या माध्यमांतल्यान प्रतिनिधींनी गोंयच्या आध्यात्मिक समृद्धीचो अणभव घेवपाक सांगलें.

सायबर सुरक्षे खातीर राष्ट्रीय सल्लागार संस्था म्हूण CERT-In म्हत्त्वाची भूमिका बजावता आनी परिशदेच्या व्यासपीठार चर्चा जाल्ले ‘ऑडिट मॉनिटरिंग बेंचमार्क ॲनालिसिस’ सारखे उपक्रम, सायबर सुरक्षा यंत्रणा मजबूत करपाक आनी उत्तरदायित्व सुनिश्चित करपाक म्हत्वपुर्ण थारतले, तशेंच आर्टिफिशियल इंटेलिजन्स सारख्या तंत्रज्ञानाक लागून सायबर सुरक्षेक चालना मेळपाक शकतली, अशेंय तांणी सांगलें.

CERT-In चे वरिश्ठ संचालक श्री एस. एस. शर्मा; CERT-In चे महासंचालक डॉ. संजय बहल; BITS पिलानी गोवा कॅम्पसाचे संचालक प्रा. सुमन गुंडू; डॉ. नितुपम मल्होत्रा; श्री शशी धरन; श्री एस. कृष्णन हांच्या सयत सायबर सुरक्षा क्षेत्रातले तंज्ञ ह्या वेळार उपस्थित आशिल्लें.

म्हा /सप/ / विगां/ 2026/292