कुंकळ्ळीच्या बंडातल्यान युवकांक सदाच प्रेरणा मेळटली- श्री. फळदेसाय

1583 वर्सा इतिहासीक कुंकळ्ळी बंडाच्या वेळार कुंकळ्ळीच्या 16 महानायकांनी पत्करलेले हौतात्म्य गोंयच्या आताच्या तशेंच फुडल्या पिळग्यांखातीर प्रेरणादायक आसून तांणी केल्ल्या त्यागातल्यान प्रत्येक गोंयच्या तरणाट्यांक गोंय आनी देशाच्या विकासाक योगदान दिवपाची स्फुर्त मेळटली, अशें समाज कल्यण मंत्री श्री. सुभाष फळदेसाय हांणी आयज कुंकळ्ळी बंडाच्या महानायकांच्या स्मारकाचेर पुष्पचक्र अर्पण करून कुंकळ्ळी बंडाच्या महानायकांक श्रद्धांजली ओपल्या उपरांत उलयतना सांगलें.

कुंकळ्ळीच्या 16 महानायकांनी पोर्तुगीज सत्तेआड बंड करून हौतात्म्य पत्करले. पोर्तुगीज सत्तेआड 16 फुडाऱ्यांनी केल्ल्या कुंकळ्ळीच्या बंडाक गोंय मुक्ती चळवळीच्या इतिहासात व्हड म्हत्व आसून ह्या बंडाच्या इतिहासाचो आस्पाव सरकाराच्या नियोजीत गोंय मुक्ती चळवळीच्या इतिहासा वयल्या एनिमेशन फिल्मात करपाक विशेश प्रयत्न करपात येतले, अशें तांणी सांगलें.

गोंयचो इतिहास आनी दस्तावेज सांबाळून दवरपा खातीर पुरातत्व आनी पुराभिलेख खात्यावतीन डिजिटलायजेशन करपाचे काम चालू आसा, अशेंय श्री. फळदेसाय हांणी सांगलें.

विरोधी फुडारी श्री. युरी आलेमांव हांणी कुंकळ्ळीचो बंड हो परकीय सत्तेआड केल्लो आशियातलो पयलो बंड म्हूण मानपाक जाय. भारतात पयलो बंड 1857 वर्सा ब्रिटीश सत्तेआड जालो, पुण कुंकळ्ळीचो बंड 274 वर्सां पयली जाल्लो, अशें सांगलें. कुंकळ्ळीच्या स्मारकाचे सुशोबिकरण करपा सयत 16 महानायकांचे पुतळें येता त्या वर्सा मेरेन उबारतले, अशेंय तांणी सांगलें.

स्वातंत्र्य सैनिक संघटनेचे अध्यक्ष श्री. रोहिदास देसाय हांणी कुंकळ्ळी बंडाचो इतिहास सरकारान शालेय पाठ्यपुस्तकांत आस्पाव केल्ले खातीर समाधान व्यक्त केले. तशेंच तांणी लोकांक कुंकळ्ळी बंडाच्या महानायकांनी केल्ल्या त्यागातल्या प्रेरणा घेवपाची आनी सामाजीक सलोखो राखपाचो उलो मारलो.

ह्या वेळार मानेस्तांच्या हस्तुकीं समाजा खातीर योगदान दिल्ले बद्दल संदीप देसाय आनी डायगो कुतिन्हो हांका कुंकळ्ळी श्री पुरस्कार, फुटबॉल खेळगडो किनन आल्मेदा हांका कुंकळ्ळी ज्योती पुरस्कार आनी मोहन नाईक हांका कुंकळ्ळी मित्र पुरस्कार भेटोवन सन्मान केलो.

नावेलीचे आमदार श्री. उल्हास तुयेंकर, कुंकळ्ळी नगरपालिकेचे नगराध्यक्ष लॅंड्री मास्कारेन्हस, दक्षीण गोंय जिल्हाधिकारी इग्ना क्लिटस, पुलीस अधिक्षक टिकम सिंग वर्मा, कुंकळ्ळी चिफटेन्स मेमोरियल ट्रस्टाचे अध्यक्ष श्री. ऑस्कर मार्टिन आनी हेर मानेस्त कार्यक्रमाक उपस्थित आशिल्लें. विजय कुमार कोपरे हांणी कार्यक्रमाचे सुत्रसंचालन केले.

म्हा /सप/ / विगां/ 2025/612