राजभाषा संचालनालयातर्फे उध्या अस्मिताय दिवस

१५ जानेवारी २०२६

गोवा सरकारच्या राजभाषा संचालनालयातर्फे राज्य पातळीवर “अस्मिताय दीस”(जनमत कौल) हा कार्यक्रम उध्या शुक्रवार १६ जानेवारी २०२६ रोजी सकाळी ९.३० वाजता साजरा केला जाणार आहे. हा कार्यक्रम गोवा राज्य जैवविविधता मंडळ, साळगांव, गोवा राज्य विज्ञान व तंत्रज्ञान परिषद, साळगांव आणि नियोजन, सांख्यिकी व मूल्यांकन संचालनालय, पर्वरी यांच्या सहकार्याने आयोजित करण्यात आला आहे. सदर कार्यक्रम पणजी येथील इन्स्टिट्यूट मिनेझीस ब्रागांझाच्या मुख्य सभागृहात गोव्याचे माननीय मुख्यमंत्री तसेच राजभाषा मंत्री डॉ. प्रमोद सावंत, विज्ञान, तंत्रज्ञान व कचरा व्यवस्थापन मंत्री श्री.आतानासियो मोन्सेरात व इतर मान्यवरांच्या उपस्थितीत होईल.

या सोहळ्यात गोव्यातील पांरपरिक खाद्य पदार्थांना मिळालेल्या जीआय-टॅग प्राप्त झालेल्या अर्जदारांचा सत्कार माननीय मुख्यमंत्र्यांच्या हस्ते करण्यात येईल. तसेच,गोव्यातील फुलवाले, गोव्यातील भाजीवाले, पाडेली/रेंदेर, मीठागार कामगार, मच्छीमार,ग्रामीण वैद्य, पोदेर, पारंपरिक गूळ तयार करणारे, माडाच्या झावळ्यांपासून मल्ले विणणारे, करवंटी, काथा यांपासून वस्तू तयार करणारे कारागीर, विशेष व्यवसाय – बांबू कामगार, चटया तयार करणारे, खाजेकार, शेवकार, फोवकार, चणेकार, विणकार (बनकर)अशा पारंपरिक व्यावसायिकांना ‘कौशल्य मित्र कार्ड’ दिली जातील.

त्याचप्रमाणे, जीआय-टॅग प्राप्त झालेल्या गोमंतकीय उत्पादांचे प्रदर्शनही यावेळीआयोजित करण्यातआले आहे. गोवा राज्य जैवविविधता मंडळाच्या गोमंतकीय उत्पादनाचे प्रदर्शन व विक्रीही या कार्यक्रमात होईल. यावेळी पुस्तक प्रदर्शनाचेही आयोजन करण्यात आले आहे.

उद्घाटन सोहळ्यानंतर कला व संस्कृती संचालनालय आणि गोवा कोंकणी अकादमीतर्फे ‘अस्मितेचीं गितां’ हा गीत-संगीताचा कार्यक्रम सादर होईल. या मुख्य सोहळ्यासोबतच, राज्यभरात विविध ठिकाणी अनुदानित संस्थांतर्फे जनमत कौल दिनाच्या औचित्याने विविध कार्यक्रम आयोजित करण्यात आले आहेत. गोवा कोंकणी अकादमी, दाल्गाद कोंकणी अकादमी, कोंकणी भाषा मंडळ, गोवा आणि अखिल भारतीय कोंकणी परिषद या संस्थांतर्फे कार्यक्रम होणार आहेत. गोवा कोंकणी अकादमीतर्फे दिव्यांग मुलांसाठी चेतना एज्युकेशन सोसायटीस स्कूल फॉर स्पेशल चिल्ड्रन, कुडचडें येथे सकाळी १०.०० वाजता. ‘अस्मितेचो भेसरंग’ हा कार्यक्रम होईल.

तसेच सत्तरी येथे साहित्य मंथन – सत्तरी आणि पीएम श्री सरकारी हायस्कूल, ठाणे –सत्तरी यांच्या सहकार्याने सकाळी १० वाजता “अस्मिताय आणि तरणाटे” या विषयावर वक्तृत्व स्पर्धा होईल. याशिवाय राज्यभरात विविध कार्यक्रम आयोजित करण्यात आले आहेत. दाल्गाद कोंकणी अकादमीतर्फे सेंट थॉमस चर्च हॉल, कांसावली येथे सकाळी ९.३० वाजता कोंकणी गीत संगीत कार्यक्रम आणि दुपारी ३.३० वाजता पणजी येथे कविता सांज हे कार्यक्रम होणार आहेत.

तसेच, कोंकणी भाषा मंडळातर्फे कोंकणी भवन, मडगाव येथे सकाळी ८ ते दुपारी १२ वाजेपर्यंत प्रश्नमंजुषा स्पर्धा, तर दुपारी १२ ते १ वाजेपर्यंत सांस्कृतिक कार्यक्रम होणार आहे. त्याचप्रमाणे संध्या. ४ ते ६ वाजेपर्यंत गोमन्त विद्या निकेतन, मडगाव येथील सभागृहात सांस्कृतिक कार्यक्रमाचे आयोजन करण्यात आले आहे. अखिल भारतीय कोंकणी परिषदेतर्फे केपे तालुक्यातील शाळा व उच्च माध्यमिक विद्यालयांमध्ये केपे व कुडचडे भागांतील संस्थांच्या सहकार्याने विविध स्पर्धा, जागरुकता कार्यक्रमांचे आयोजन करण्यात आले आहे. सर्वांनी कार्यक्रमाला उपस्थित राहावे असे आवाहन राजभाषा संचालनालयातर्फे करण्यात आले आहे.

मा/वाप/दिबां/ एपी /रना/ २०२६/३९