मुख्यमंत्र्याकडल्यान गोंयच्या लोकांक गोंय मुक्ती दिसाची परबीं

ता. 18 डिसेंबर 2024

मुख्यमंत्री डॉ. प्रमोद सावंत हांणी गोंयच्या लोकांक गोंय मुक्ती दिसाची उर्बेभरीत परबीं भेटयल्या. मुख्यमंत्री आपल्या संदेशात म्हणटा, आमच्या स्वातंत्र सैनिकांनी केल्ले अथक प्रयत्न आनी त्यागाक लागून 19 डिसेंबर 1961 वर्सा आमका पोर्तुगीजांच्या 450 वर्सांच्या परकीय राजवटीपासून स्वातंत्र्य मेळ्ळे आनी गोंय हे भारताचो अंतर्गत भाग जालो. गोंय मुक्ती दिसाच्या आयच्या ह्या इतिहासीक प्रसंगार आमी आमच्या म्हान स्वातंत्र्य सैनिकांच्या त्यागाचो उगडास करून तांकां अभिवादन करूया.

गोंय सरकारान ह्या वर्सा हुतात्म्यांच्या योगदानाचो भोवमान करपाचो निर्णय घेतलो आनी गोंय मुक्ती चळवळीत हुतात्मे जाल्ल्या 15 सुटके झुजाऱ्यांच्या पयल्या पिळगेचे म्हळ्यार पुत-चलयांचो राज्य सरकारान गोंय मुक्ती दिसाच्या पुर्व संध्येक 18 डिसेंबर 2024 दिसा दरेकी 10 लाख रूपया आनी प्रमाणपत्रां दिवन भोवमान केलो.

मुक्ती उपरांत गोंय राज्यान विविध मळार तोखणायेची उदरगत केल्या. आयज गोंय हे प्रगतशील राज्य जाला. आपल्या देशाच्या सामाजीक-आर्थिक विकासा खातीर गोंय म्हत्वाचे योगदान दिता. राज्य सरकार लोककल्याणकारी येवजण्यो आनी प्रकल्पांची अंमलबजावणी करून राज्याचो सर्वांगी उदरगत करपाक प्रयत्नशील आसा. अनेक येवजण्यो आनी प्रकल्प पुराय करपाक सरकार येसस्वी जाल्ले आसा. गोंयच्या लोकांनी कसलेय मतभेद आसल्यार ते कुशीक दवरून गोंय राज्याच्या फुडल्या उदरगती खातीर एकवटान प्रयत्न करपाची गरज आसा.

गोंय मुक्ती दीस मनयतना आमी आमचे राज्य प्रगतशील, आस्पावित आनी भरभराटीचे करपाचो सोपूत घेवया. हांव परत एकदा प्रत्येकांक गोंय मुक्ती दिसाची परबीं दिता, अशें मुख्यमंत्री संदेशात म्हणटा.

म्हा /सप/ / विगां/ 2024/706