विश्वगुरू जावपाच्या दिकेन भारताची वाटचाल- राज्यपाल

ता. 26 जानेवारी 2024

भारत देश विश्वगुरू जावपाच्या दिकेन वाटचाल करता आनी एक दीस विश्वगुरू जावपाचे भारताचे सपन नक्कीच पुर्ण जातले, असो विश्वास गोंयचे राज्यपाल श्री. पी. एस. श्रीधरन पिल्लई हांणी आयज ताळगांव पठारावयल्या गोंय विद्यापिठाच्या मैदानाचेर (हॅलीपॅड वाठारात) आयोजीत राज्य पांवड्यावयल्या प्रजासत्ताक दीस सुवाळ्यात राष्ट्रीय तिरंगो बावटो हुबोवन मानवंदना दिवन आनी संचलनाची पळोवणी केल्या उपरांत उलयतना उक्तायलो.

प्रजासत्ताक दीस सुवाळ्याक मुख्यमंत्री डॉ. प्रमोद सावंत, केंद्रीय पर्यटन राज्यमंत्री श्री. श्रीपाद नाईक, राज्यसभा खासदार श्री. सदानंद तानावडे, मुख्य सचीव श्री. पुनित कुमार गोयल, पुलीस म्हासंचालक श्री. जसपाल सिंग, आमदार, सरकारी सचीव, अधिकारी, स्वातंत्र्य सैनिक, विद्यार्थी आनी नागरीक उपस्थित आशिल्लें.

गोंयच्या जनतेक प्रजासत्ताक दिसाची परबीं भेटोवन आमच्या लोकशाय घटनेची संवसारभर तोखणाय जाता, अशें राज्यपालान सांगलें. आयज संवसार भारतीय लोकशाय पंपरेकडल्यान प्रेरणा घेता, अशेंय तांणी म्हणलें.

गोंय राज्य आयज मुख्यमंश्री डॉ. प्रमोद सावंत हांच्या फुडारपणाखाला उदरगतीच्या मार्गार नेटान पावलां मारता. गोंय हे भारतातले स्मार्ट राज्य म्हूण प्रगत जाता. जीणेच्या विविध मळार नेटान प्रगती जातना पळोवक मेळटा, अशें राज्यपालान म्हणलें.

सरकारान आठ लेनीचो नवो जुवारी पुल , मोपाचो मनोहर पर्रिकर आंतरराष्ट्रीय विमानतळ अशें म्हत्वाचे विकास प्रकल्प पुर केल्यात. गोंय सरकारान जी-20 बसकांचे आनी हालीच आंतरराष्ट्रीय पर्पल फेस्ताचे यशस्वी आयोजन केले. लोकांक पिवपाच्या उदकाची पुरवण करपा बाबतीत गोंय एक आदर्श राज्य जावन आसा, अशें राज्यपालान म्हणलें. राज्यपलान गोंयच्या लोकांक देशाचे स्वातंत्र्य आनी लोकशाय वेवस्था सांबाळून दवरपाचोय उलो मारलो. तशेंच तांणी भारताक 2047 मेरेन विकसित राष्ट्र करपा खातीर एकवटान काम करपाचोय उलो मारलो.

ह्या वेळार राज्यपाला हस्तुकीं पुलीस अधिक्षक श्री. विश्राम बोरकर हांका राष्ट्रपती पुलीस पदक भेटयले. तशेंच उत्कृश्ट सेवेखातीर आयएएस अधिकारी श्री. संजीत रॉड्रिग्स, अजित रॉय, स्वेतिका साचन, आयपीएस अधिकारी निधिन वाल्सन, ओमविर सिंग, अभिषेक धानिया, आयएफएस अधिकारी शिवेंदू भुषण, सौरभ कुमार, जेबेस्तिन ए. हांचोय पदक भेटोवन भोवमान केलो. तशेंच विविध कार्यक्रम आयोजना खातीर उत्कृश्ट योगदान दिल्ल्या सरकारी अधिकाऱ्यांचोय भोवमान केलो.

म्हायती आनी प्रसिध्दी खात्याचे म्हायती अधिकारी श्री. ऑल्विन परेरा हांका जी-20 बसकांचे आयोजनावेळार केल्ल्या उत्कृश्ट सेवेखातीर पदक आनी प्रशस्तीपत्र भेटोवन सन्मान केलो.

तशेंच उत्कृश्ट संचलना खातीर शाळां आनी सुरक्षा दळांच्या पंगडांक इनामां भेटोवन सन्मान केलो.

म्हा /सप/ प्रना/ विगां/ 2024/74