मुख्यमंत्र्याकडल्यान गोंयच्या लोकांक प्रजासत्ताक दिसाची परबीं

ता. 25 जानेवारी 2024

मुख्यमंत्री डॉ. प्रमोद सावंत हांणी गोंयच्या लोकांक 75 व्या प्रजासत्ताक दिसाच्या इतिहासीक प्रसंगार उर्बेभरीत परबीं आनी शुभकामना भेटयल्या आनी देशाच्या स्वातंत्र्या खातीर बलिदान दिल्ल्या म्हान आत्म्यांक आर्गां ओपल्यात.

मुख्यमंत्री आपल्या संदेशात म्हणटा, देशांत सगळीं कडेन प्रत्येक वर्सा प्रजासत्ताक दीस व्हडा देशभक्तिच्या भावनेन मनयतात. 26 जानेवारी 1950 दिसा संविधान सभाघरान भारतीय संविधानाचो स्विकार केलो आनी आमचो देश सार्वभौम, समाजवादी, धर्मनिरपेक्ष आनी लोकशाय प्रजासत्ताक जालो, जे आमच्या देशाचे मार्गदर्शक तत्व आसा. सांस्कृतीक विविधताय आशिल्लो भारत हो व्हड लोकशाय देश आस.

प्रजासत्ताक दीस आमकां देशाक पुर्ण स्वराज्य मेळोवन दिवपा खातीर बलिदान दिल्ल्या स्वातंत्र्य सैनिकांचो आनी देशाक संविधान दिल्ल्या म्हान विद्वान फुडाऱ्यांचो उगडास करून दिता. तांच्या प्रयत्नांक लागून आयज आमी संविधानातल्या हक्कांचो लाव घेतात. आमी सगळ्यांनी संविधानीक कर्तव्यांचे पालन करपाची गरज आसा.

आयज आमी देश आनी राज्याच्या विकासा खातीर आनी एकजूट आनी शांतीकाय तिगोवन दवरपा खातीर समर्पित जावया. प्रधानमंत्री श्री. नरेंद्र मोदी हांच्या मार्गदर्शनाखाला आमच्या सरकारान विकासाच्या बाबतीन अनेक पावलां उबारल्यात. गोंयच्या प्रत्येक नागरिका मेरेन कल्याणकारी येवजणो पावोवपाक सरकार बांदील आसा. सबका साथ, सबका विकास ह्या तत्वाचेर सरकार काम करता. गोंयाक स्वयंपूर्ण करपा खातीर शिक्षण, भलायकी, रोजगार निर्माण, अशा क्षेत्राचेर सरकारान भर दिल्लो आसा.

प्रजासत्ताक दिसाच्या आयच्या प्रसंगार हांव परत एकदा समस्त गोंयकारांक परबीं भेटयता आनी विकसीत भारता खातीर योगदान दिवपाचो आनी राज्यांतली शांतीकाय, सलोखो आनी एकजूट राखून दवरपाचो उलो मारता, अशें मुख्यमंत्री आपल्या संदेशात म्हणटा.

म्हा /सप/ प्रना/ विगां/ 2024/70