बऱ्या करिअराखातीर कुशळटाय संपादन आनी प्रशिक्षणाक प्राधान्य दिवपाचो मुख्यमंत्र्यांचो उलो

ता. 12 जून 2023

आयटीआय आनी हेर अभ्यासक्रम पुर्ण केल्ल्या युवकांनी बऱ्या करिअराखातीर कुशळटाय संपादन आनी प्रशिक्षणाक प्राधान्य दिवपाचो उलो मुख्यमंत्री डॉ. प्रमोद सावंत हांणी मारला. मुख्यमंत्री आयज रवींद्र भवन, साखळी हांगा आयोजीत प्रधानमंत्री अप्रेंटिसशिप मेळाव्याच्या उक्तावण कार्यक्रमात उलयताले.

कुशळटाय विकास आनी उद्येजकताय संचालनालयान सरकारी उद्देगीक प्रशिक्षण संस्था, सत्तरी आनी सरकारी उद्देगीक प्रशिक्षण संस्था, दिवचल हांच्या जोड पालवान अप्रेंटिसशिप मेळाव्याचे आयोजन केल्ले.

प्रधानमंत्री अप्रेंटिसशिप मेळा आनी कॅम्पस प्लेसमेंट कार्यक्रमांतल्या उमेदवारांक आपली कुशळटाय वाडोवपाची आनी प्लेसमेंटची संद मेळटा. शिकाऊ उमेदवारांक कमी मानधन वा पगार मेळत आसलो तरी नवीन कुशळटाय आनी प्रशिक्षण संपादन केल्ल्यान तांका बऱ्या करिअराची दारां उकती जातात. येणाऱ्या काळांत गोंयांत पर्यटन उद्येगातल्यान सुमार दोन लाख रोजगाराच्यो संधी निर्माण जावपाची अपेक्षा आसा, अशें मुख्यमंत्र्यान सांगलें.

ह्या अप्रेंटिसशिप मेळाव्याच्या माध्यमातल्यान 54 उद्देगीक आस्थापनां आनी चार सरकारी कार्यालयांनी शिकाऊ उमेदवारीची संद उपलब्ध करून दिल्या. मेळाव्याखातीर 576 उमेदवारांनी नावनोंदणी केल्या. उद्देगीक आस्थापनां आनी सरकारी कार्यालयांनी शिकाऊ उमेदवारीची 641 पदां उपलब्ध आसात.

कार्यक्रमाक जिल्हा पंचायत सदस्य श्री गोपाळ सुर्लकर, साखळीचे उपनगराध्यक्ष श्री आनंद काणेकर, साखळी रवींद्र भवनचे उपाध्यक्ष श्री विठोबा घाडी, आयटीआय वेवस्थापन समितीचे अध्यक्ष श्री सीताराम गावस, नगरसेवक श्री ब्रह्मानंद देसाय आनी आयटीआय केंद्रां चे अधिकारी आनी प्रशिक्षक उपस्थित आशिल्लें.

कुशळटाय विकास आनी उद्येजकताय संचालनालयाचे उपसंचालक (प्रशिक्षण) श्री.एस.एस.गावकर हाणी मानेस्तांक येवकार दिलो. सत्तरी शासकीय आयटीआयचे प्राचार्य श्री नीलेश गावस हांणी उपकार मानले. श्रीमती आल्सीना रेबेलो हांणी कार्यक्रमाचे सूत्रसंचालन केले.

म्हा /सप/ प्रना/ विगां/ 2023/493