मुख्यमंत्र्यांच्या हस्तुकीं श्री विठ्ठल रखुमाई सरकारी मुळावी शाळा इमारतीचे उक्तावण
ता.3 फेब्रुवारी 2023
मुख्यमंत्री डॉ. प्रमोद सावंत हांणी आयज विठ्ठलापूर सांखळी हांगा थळावे आमदार श्री प्रेमेंद्र शेट हांच्या उपस्थितीत श्री विठ्ठल रखुमाई सरकारी मुळावी शाळा इमारतीचे उक्तावण केले.
शिक्षण खात्याचे संचालक शैलेश झिंगडे, जिल्हा पंचायत वांगडी श्री महेश सावंत, सरपंच श्री दत्तप्रसाद खारकांडे, गोंय राज्य साधन सुविधा विकास महामंडळाचे वेवस्थापकीय संचालक श्री हरीश हडकोणकर, श्री मंगिरीश दुभाषी आनी हेर मानेस्त ह्या वेळार उपस्थित आशिल्लें.
उक्तावणाच्या कार्यक्रमात उलयतना मुख्यमंत्री डॉ. प्रमोद सावंत हांणी सांखळी हे एकमेव गाव आसा जंय तुमकां KG ते PH.D मेरेनचे शिक्षण मेळटा अशें सांगून नवीन शिक्षणीक धोरणांखाला आवश्यक पायाभूत अभ्यासक्रम सुरू करपात येतले, अशें सांगलें.
फाटल्या 15 दिसांत सरकारान गोंय राज्यांत तीन अत्याधुनिक मुळाव्या शाळा इमारतींचें उक्तावण केले आनी ह्या शाळांनी जागतिक दर्जाच्यो पायाभूत सुविधा उपलब्ध करून दिल्ल्याचे मुख्यमंत्र्यान सांगलें.
मुख्यमंत्र्यान म्हणले, विद्यार्थ्यांचे उज्ज्वल भविष्य घडोवपा खातीर शिक्षणीक संस्थांनी आवश्यक पायाभूत सुविधा उपलब्ध करून दिवपाक सरकार वचनबद्द आसा. विद्यार्थ्यांनी नाविन्यपूर्ण कल्पनांसयत यसस्वी करिअर घडोवपाचो सल्लो तांणी दिलो. शाळेची इमारत हेच भुरग्यांखातीर शिकपाचे साधन आसा. शिक्षणीक संस्थांनी पोशक वातावरण तयार करपाखातीर सरकाराचे सतत प्रयत्न आसतात. अशें तांणी सांगलें.
आमदार श्री प्रेमेंद्र शेट, शिक्षण संचालक शैलेश झिंगडे, सरपंच श्री दत्तप्रसाद खारकांडे हांचेय ह्या वेळार भाशण जाले.
ह्या वेळार मुख्यमंत्र्यांच्या हस्तुकीं श्री मांगिरीश दुभाषी, श्री संदिप चोडणेकर, श्री दत्तप्रसाद वागळे, अॅड. नारायण सावंत, श्री भुवनेश्वर आनी पालक-शिक्षक संघाचे अध्यक्ष श्री वर्धमान शेंदुरे हांचो सत्कार जालो.
सुरूवातीक मुख्याध्यापिका श्रीमती कल्पना मळीक हांणी मानेस्तांक येवकार दिलो. श्रीमती कविता धावस्कर आनी श्वेता पुजारी हांणी कार्यक्रमाचे सुत्रसंचालन केले. श्रीमती रेश्मा परब हांणी उपकार मानले.
दोन माळ्यांच्या अत्याधुनिक शाळा इमारतीत 14 वर्गकुडीं, संगीत आनी नृत्य शिक्षणाखातीर वेगळें वर्ग, खेळां हॉल, वाचपघर, ध्यान कक्ष आसा. ह्या शाळा इमारत प्रकल्पाचे बांदकाम 5.59 कोटी खर्च करून पुर्ण केला.
म्हा /सप/ ऑपे/ विगां/ 2023/123