समाजातल्या दुर्लक्षीत घटकांच्या सक्षमीकरणा खातीर लोकशाय, विशयाचेर बसकेत चर्चा
ता. 2 जानेवारी 2026
मुख्य वेंचणूक अधिकाऱ्याच्या फुडारपणाखाला फाटल्या मंगळारा दिसा “समाजातल्या दुर्लक्षीत घटकांच्या सक्षमीकरणा खातीर लोकशाय” ह्या विशयाचेर एक बसका आयोजीत केल्ली. आस्पावीत लोकशाय पद्धतींक घटाय दिवप आनी वेंचणूक प्रक्रियेत दुर्लक्षीत समुदायांचो सहभाग वाडोवप हो बसकेचो उद्देश आशिल्लो.
बसकेक गोंय विद्यापीठाचे प्रतिनिधी श्री (डॉ.) राहुल त्रिपाठी आनी राज्यशास्त्र विभागाचे सहाय्यक प्रा. रावजी गावकर, व्ही.एम. साळगावकर कायदे महाविद्यालयाचे प्राचार्य, श्री (डॉ.) शबीर अली, आयपीएचबी चे सहाय्यक प्राध्यापक श्री सुदेश गावडे, सहाय्यक मुख्य वेंचणूक अधिकारी आनी राज्य प्रशिक्षण नोडल अधिकारी श्रीमती सपना एस. नाईक बांदोडकर आनी हेर अधिकारी उपस्थित आशिल्लें.
बसकेत दिव्यांग व्यक्ती, ज्येश्ठ नागरीक, अनुसूचीत जाती, अनुसूचीत जमाती, हेर मागास वर्ग, अर्थिक मागास वर्ग, पीव्हीटीजीएस, ट्रान्सजेंडर आनी हेर सामाजिकदिश्ट्या वंचीत समाजांची सुलभता, जागरूकताय आनी सहभागाची खात्री करपा खातीर वेंचणूक आयोगान सुरू केल्ल्या विविध उपक्रमांचेर चर्चा जाली.
बसकेत मार्गदर्शन करतना मुख्य वेंचणूक अधिकाऱ्यान सांगलें, की भारतान इंटरनॅशनल इन्स्टिट्यूट फॉर डेमोक्रसी अँड इलेक्टोरल असिस्टन्स (इंटरनॅशनल आयडीईए) चे अध्यक्षपद स्वीकारला आनी ह्या म्हत्वाच्या जबाबदारीतल्यान जागतिक पांवड्यार लोकशाय मूल्यां, आस्पावीत प्रशासन आनी मजबूत वेंचणूक प्रक्रिये बाबतीत भारताची वचनबद्धता दिसून येता.
आंतरराष्ट्रीय पांवड्यावयले भारताचे अध्यक्षपद लोकशाय सहभागा वरवीं समाजातल्या दुर्लक्षीत घटकांक सक्षम करपाच्या देशाच्या प्रयत्नांचे प्रदर्शन करपाची एक म्हत्त्वाची संद उपलब्ध करता, अशेंय तांणी सांगलें.
मुख्य वेंचणूक अधिकाऱ्यान बसकेत सहभागीं प्रतिनिधींक आपल्या संबंदीत संस्थांतल्या जाणकारांची मजत घेवन “समाजातल्या दुर्लक्षीत घटकांच्या सक्षमीकरणा खातीर लोकशाय” ह्या विशयाचेर सविस्तर अहवाल तयार करपाक सांगलें. आस्पावीत लोकशाय पद्दतीक अदीक मजबूत करपाक उपेगी थारपी सर्वोत्तम पद्धती, आव्हांना आनी नवीन दिश्टीकोनांचेर उजवाड घालपाची विनंती केली. लोकशाय मुल्यांचो सांबाळ जावचो आनी दुर्लक्षीत घटकांचे प्रस्न समजून घेवन तांकां लोकशाय प्रक्रियेत न्याय आनी प्रतिनिधित्व दिवपा खातीर एकजूटीन प्रयत्न करपाची गरज उक्तायली.
म्हा /सप/ / विगां/ 2026/10