संवसारीक होमिओपॅथी दीस मनयलो उपचारा परस प्रतिबंधक उपाय सदाच बरे आसता आनी बेगीन निदान जालें जाल्यार जीव वाचपाक शकता- मुख्यमंत्री डॉ. प्रमोद सावंत

ता. 11 एप्रिल 2026

सांखळेच्या साई नर्सिंग इन्स्टिट्यूटात आयज संवसारीक होमिओपॅथी दीस मनयलो. सर्वांगीण आनी प्रतिबंधात्मक भलायकी सेवा मजबूत करपात होमिओपॅथीच्या भूमिकेचेर उजवाड घालपा खातीर ह्या कार्यक्रमात भलायकी सेवा मळावयले वेवसायिक, शिक्षणतज्ज्ञ आनी दोतोर उपस्थित आशिल्लें. गोंय होमिओपॅथी मंडळान श्री कामाक्षीदेवी होमिओपॅथिक मेडिकल कॉलेजच्या सहकार्यान आयोजीत केल्ल्या ह्या कार्यक्रमात डॉ. सॅम्युअल हॅनेमन हांची 271 वी जयंती लेगीत मनयली.

‘शाश्वत भलायके खातीर होमिओपॅथी’ ह्या संकल्पनेखाला आयोजीत ह्या कार्यक्रमात, एकात्मिक वैजकीय प्रणालींचे वाडटे म्हत्व आनी सुलभ आनी शाश्वत भलायकी सेवेक प्रोत्साहन दिवपात होमिओपॅथीच्या भूमिकेचेर उजवाड घातलो. ह्या कार्यक्रमात भलायकी सेवेतल्या योगदाना खातीर नामनेचे होमिओपॅथी डॉक्टर आनी वेवसायिकांचो सत्कारय जालो. प्रतिबंधात्मक भलायकी तपासणी, डिजिटल सुविधा आनी ग्रामीण वाठारांनी सुलभता सुदारपाचेर विशेश लक्ष केंद्रित करून गोंय सगळ्यां पांवड्यार भलायकी सेवेचो विस्तार करता. सरकारान सुरू केल्ल्या प्रतिबंधात्मक भलायकी मोहिमेचो राज्यभरातल्या चाळीस हजारा परस चड बायलांनी लाव फायदो घेतला.

ह्या वेळार उलयतना मुख्यमंत्री डॉ. प्रमोद सावंत हांणी “उपचारा परस प्रतिबंधक उपाय सदाच बरे आसता आनी बेगीन निदान जालें जाल्यार जीव वाचपाक शकता” अशें सांगलें. तांणी फुडें सांगलें, सरकारान प्रतिबंधात्मक भलायकी सेवा मजबूत करपाचेर आनी सगळ्यां पांवड्याचेर सेवांचो विस्तार करपाचेर भर दिल्लो आसा, जेणेकरून प्रत्येक नागरिकाक भलायकी सेवा सोपेपणी उपलब्ध जातल्यो. आयुष मंत्रालयाची स्थापना जाल्ल्यान भारताची भलायकी सेवा वेवस्था मजबूत जाल्या आनी संवसारीक पांवड्यार पारंपरिक वैजकी पद्दतीक प्रोत्साहन मेळ्ळा, अशेंय तांणी सांगलें.

मुख्यमंत्री डॉ. सावंत हांणी सांगलें, भलायकी सेवा मळार कुशळ वेवसायिक आनी मनीसबळ निर्माण करपा खातीर होमिओपॅथी महाविद्यालयांसारख्या संस्थांक मजत करपा वांगडाच वैजकीय शिक्षण, संशोधन आनी पायाभूत सुविधा मजबूत करपा खातीर सरकार कटिबद्ध आसा. तशेंच वेलनेस पर्यटनाक प्रोत्साहन दिवपात येता, अशेंय तांणी सांगलें.

ह्या कार्यक्रमाक गोंय होमिओपॅथी मंडळाचे रजिस्ट्रार डॉ. राजेंद्र काणेकर, गोंय होमिओपॅथी मंडळाचे अध्यक्ष डॉ. बिपिन साळकर, श्री कामाक्षीदेवी होमिओपॅथिक वैजकीय महाविद्यालयाचे प्राचार्या डॉ. रोशनी शिरवयकर, साई नर्सिंग इन्स्टिट्यूटच्यो प्राचार्या डॉ. अदिती सावंत देसाय आनी गोंय वैजकीय महाविद्यालयाचे डॉ. आरिफ रझा आनी भलायकी सेवा मळावयले वेवसायिक उपस्थित आशिल्लें.

म्हा /सप/ / विगां/ 2026/247