विकसीत गोंय करपा खातीर एकवटान काम करूया: मुख्यमंत्री
ता. 6 जून 2025
प्रधानमंत्री श्री. नरेंद्र मोदी हांचे विकसित भारत 2047 चे स्वप्न पुराय करपाखातीर गोंय सरकार काम करता. त्याच धर्तेर आमी विकसित गोंय 2037 चे नियोजन केल्ले आसा, अशें मुख्यमंत्री डॉ. प्रमोद सावंत हांणी आयज गोंय सरकाराच्या ग्रामीण विकास खात्यान प्रधानमंत्री आवास येवजणे खाला आयोजीत प्रादेशीक ग्रामीण कार्यशाळेत उलयतना सांगलें.
मुख्यमंत्र्यान फुडें सांगलें, राज्य सरकाराची स्वतःची अटल आसरा येवजण आसा, जीचो उद्देश प्रत्येक नागरिकाक स्वताचे घर उपलब्ध करून दिवप आसा. केंद्र सरकारान सगळ्यां खातीर भलायकी, सगळ्यां खातीर घरां, सगळ्यां खातीर उदक आनी लोकांच्या हिता खातीर हेर साबार उपक्रम सुरू केल्यात. राज्य सरकारान हातूंतले 80 टक्के कार्यक्रम पुराय केल्ले आसात.
गोंय सरकार राज्याक शेती, नुस्तेमारी, कुशळटाय विकास आनी हेर मळार स्वयंपूर्ण करपाक प्रयत्नशील आसा. केंद्र सरकाराच्या सहकार्यान विकसित गोंय हे सरकाराचे स्वप्न पुर्ण करपा खातीर एकवटान काम करपाची गरज आसा, अशेंय मुख्यमंत्र्यान सांगलें.
भारत सरकाराच्या ग्रामीण विकास मंत्रालयाचे राज्यमंत्री डॉ. चंद्रशेखर पेम्मासानी हांणी आपल्या उलोवपात, सगळ्यां खातीर घरां उपलब्ध करून दिवप हे सरकाराचे उद्दीश्ट आसून पाच कोटी लोकांक घरां उपलब्ध करून दिवपाची येवजण आसा. पीएमएवाय- ही ग्रामीण वाठारांतल्या लोकांक घरां उपलब्ध करून दिवपाच्या उद्देशान सुरू केल्ली येवजण आसून न्हय फकत निवारो म्हूण तर शाश्वत विकासाचो एक म्हत्त्वाचो उपक्रम जावन आसा.
ग्रामीण विकास मंत्री श्री गोविंद गावडे हांणी कार्यशाळेचो उद्देश सांगतना, प्रधानमंत्री आवास येवजणेच्या अंमलबजावणीत येवपी अडचणी ह्या प्रादेशीक ग्रामीण कार्यशाळे वरवीं सुटाव्यो जावपाक मजत जातली अशें सांगून केंद्र सरकाराची सगळ्यां खातीर घरां ही एक म्हत्वाची येवजण आशिल्ल्याचें सांगलें आनी ह्या येवजणेचो लाव तळागळांतल्या लोकांक पावोवपा खातीर संबंदीत अधिकारी आनी लोकप्रतिनिधींनी काम करपाची गरज व्यक्त केली.
ग्रामीण विकास मंत्रालयाचे उपमहासंचालक श्री गया प्रसाद हांणी येवजणे विशीं म्हायती दिली.
कार्यशाळेक आमदार श्री प्रेमेंद्र शेट, श्री आंतोन वाज, ग्रामीण विकास सचीव श्री संजय गोयल, प्रकल्प संचालक श्री प्रेमराज शिरोडकर, प्रकल्प संचालक DRDA श्रीमती दिपाली नाईक आनी हेर अधिकारी उपस्थित आशिल्लें.
म्हा /सप/ / विगां/ 2025/531