नोबॅल जैतवंत प्रो. वेंकी रामकृष्णन हांचे एनआयओ च्या सभाघरांत व्याख्यान

ता. 13 जानेवारी 2026

गोंय सरकारच्या उच्च शिक्षण संचालनालयान रसायनशास्त्रातले नोबॅल जैतवंत आनी जगातले प्रभावशाली शास्त्रज्ञ प्रो. वेंकी रामकृण्णन हांचे फाल्या तारीख 14 जानेवारी 2026 दिसा सांजेच्या 3.30 वराचेर सीएसआयआर- राष्ट्रीय समुद्र विज्ञान संस्था (एनआयओ) , दोनापावला, गोंय हांगा भौशीक व्याख्यान आयोजीत केला. जागतीक नामनेच्या शास्त्रज्ञाक आयकुपाची गोंयच्या लोकांक ही दुर्मीळ संद आसा, जांणी आपल्या वावरातल्यान आधुनिक जीवनशास्त्राक आकार दिला. जीवीत, दीर्घ पिराय आनी मानवी अस्तित्वाची मर्यादा- “आमी कित्याक मरतात?” ह्या प्रस्नांचे उत्तर तांच्या व्याख्यानातल्यान मेळटले.

प्रो. वेंकी रामकृण्णन हांका रसायनशास्त्रातल्या वावरा खातीर 2009 त नोबॅल पुरस्कार फोवो जाला. रिबोसमाची रचणूक आनी कार्य, सगळ्या जीवंत पेशींनी प्रोटिनाचे संयोगिकरण करपी मॉलेक्युलर मशीना वयल्या संशोधन वावरा खातीर तांका हो नोबॅल पुरस्कार फोवो जाला. मॉलेक्युलर पांवड्यार जीण कशी चलता हे तांच्या संशोधनातल्यान दिसून आयले आनी वैजकीय प्रगतीक खास करून एन्टिबायोटिक्स आनी जनेटिक नियमन समजपाक मार्ग मेळ्ळो.

आपल्या व्याख्यानातल्यान ते “आमी कित्याक मरतात?” ह्या गुपीताचेर उजवाड घालतले. जीवीत, दीर्घ पिराय आनी मानवी अस्तित्वाची मर्यादा- हाचोय खुलासो ते करतले. हे व्याख्यान तंज्ञ, संशोधक, शिक्षक, विद्यार्थीं आनी लोकां खातीर म्हत्वाचे आसा. खास करून विद्यार्थ्यांक नोबॅल जैतवंता कडल्यान प्रेरणा घेवपाक आनी संवाद साधपाची संद मेळटली. इत्सुक लोकांनी ह्या व्याख्यानाक उपस्थित रावपा खातीर उच्च शिक्षण संचालनालयाच्या https://dhe.goa.gov.in ह्या पोर्टलाचेर उपलब्ध आशिल्ल्या QR कोडाचो वापर करून पयली नोंदणी करपाक जाय.

म्हा /सप/ / विगां/ 2026/46