Home »News

भारतीय शास्त्रीय नृत्य प्रकारांत नृत्य व्याख्यान प्रात्यक्षीक मालिका

ता. २८ ऑगस्ट २०१८

   भाद्र ६,१९४०

 

          गोंय सरकारच्या कला व संस्कृती संचालनालयान नवी दिल्लीच्या भारत आंतरराष्ट्रीय ग्रामीण सांस्कृतीक केंद्राच्या सहकार्यान गोंयांतल्या  २४ शाळांनी भारतीय शास्त्रीय नृत्य प्रकारांत नृत्य व्याख्यान प्रात्यक्षीक सादरीकरण मालिकेचे आयोजन केलां. ३ ते ८ सप्टेंबर २०१८ मेरेन जावपी ह्या उपक्रमांत पुणे हांगासल्ल्यो कथ्थक नृत्यांगना श्रीमती अमर्त्या चटर्जी (घोष) आनी बंगलुरू हांगासल्ल्यो  भरतनाट्यम् नृत्यांगना श्रीमती रेवती श्रीनिवासराघवन्  हांची उत्तर  आनी दक्षिण गोंयांत नृत्य व्याख्यानां जातली. शिक्षणातली सांस्कृतीक मूल्ल्यां अदीक घटमूट करप आनी नृत्य आनी संगीत ह्या भारतीय सांस्कृतीक वारशा बद्दल विद्यार्थ्यां मदीं जागृती निर्माण करप हो ह्या उपक्रमाचो मुखेल हेतू जावन आसा.

          श्रीमती अमर्त्या  चटर्जी (घोष) हांचे कडेन कथ्थक नृत्यातली पदविका आसून पत्रकारिता आनी मास कम्युनिकेशनांत पदव्युत्तर शिक्षण तांणी घेतला. तांणी पं. संतोष कुमार चटर्जी, श्रीमती मधुमिता राय, पद्मविभूषण पं. बिर्जु महाराज आनी शाश्वती सेन हांचे कडल्यान प्रशिक्षण घेतला . तांणी भारतात तशेंच भारता भायर कथ्थकाचे कार्यक्रम केल्यात.

          श्रीमती अमर्त्या चटर्जी (घोष) आनी तांचे वांगडी ३ ते ८ सप्टेंबर मेरेन उत्तर गोंयांतल्या १२ शाळांनी नृत्य व्याख्यान प्रात्यक्षीक सादरीकरण करतली. तातूंत धारगळ-पेडणे हांगासल्लें लोकशिक्षण हायस्कूल, हळर्ण-पेडणेचें हळर्ण पंचक्रोशी हायस्कूल, म्हापशेचें जी. एस. आमोणकर विद्यामंदिर, शिवोली-बार्देसांतलें कीर्ती विद्यालय, आमोणा-दिवचलचें सरकारी विद्यालय, कुडणे-सांखळी दिवचलचें महालक्ष्मी हायस्कूल, वाळपयचें अवर लेडी ऑफ लूर्डस् हायस्कूल, वाळपयचें युनिटी हायस्कूल,, शिरोडाचें श्री. कामाक्षी हायस्कूल, तळावली-फोंडा हांगासल्लें श्री महालक्ष्मी इंग्लिश हायस्कूल, पणजेचें पीपल्स हायस्कूल आनी काटेभाट एला-ओल्ड गोवा हांगासल्लें ओल्ड गोवा एज्युकेशनल इन्स्टिट्युट ह्या शाळांचो आसपाव आसा.  

          श्रीमती रेवती श्रीनिवासराघवन् हांणी प्राथमीक शिक्षण स्व. गुरू कोमालवल्ली कृष्णमणी हांचे कडल्यान घेतला आनी ताचे उपरांतचें पद्मभूषण श्रीमती कलानिधी नारायणन्, एस. पी. श्रीनिवासन् आनी टी. एस. नंदकुमार हांचे कडल्यान शिक्षण घेतला. सद्या त्यो श्री. सतीश कृष्णमूर्ती हांचे कडल्यान प्रशिक्षण घेतात. त्यो फायन आर्टसांत पदव्युत्तर आसून, अखिल भारतीय गंधर्व महाविद्यालयाच्यो नृत्य अलंकार पदवीधारक आसात. तांणी विंगड विंगड कार्यक्रम, चर्चासत्रां, कार्यशाळांत भाग घेतला तशेंच शाळा, महाविद्यालयां आनी विद्यापीठांत व्याख्यानाय दिल्यात. भारत तशेंच विदेशांत तांचे कार्यक्रमूय जाल्यात.  

          श्रीमती रेवती श्रीनिवासराघवन् आनी तांचे वांगडी ३ ते ८ सप्टेंबर मजगती दक्षिण गोंयांतल्या १२ शाळांनी नृत्य व्याख्यान सादरीकरण करतली. तातूंत रिवण-सांगेचें अवर लेडी ऑफ फातिमा हायस्कूल, नेत्रावळी-सांगेचें सरकारी विद्यालय, पिळिये-धारबांदोडाचें  गोमंतक विद्यालय, तामसाडो-धारबांदोडाचें मातोश्री आनंदीबाई वामन मराठे विद्यालय, फातोर्डा हांगासल्लें प्रेझेंटेशन कॉन्व्हेंट हायस्कूल, मडगांवचें भाटीकर मॉडेल हायस्कूल, आगोंदा हांगासल्लें सरकारी विद्यालय, काणकोणचें श्री मल्लिकार्जुन विद्यालय हायस्कूल, शिरवई-केपेचें लोकविश्वास प्रतिष्ठान हायस्कूल, बाळ्ळी-केपे हांगासल्लें विवेकानंद उच्च माध्यमिक विद्यालय, वास्कोचें अवर लेडी ऑफ कॅन्डेलेरिया हायस्कूल आनी वास्कोचें म्युनिसीपल हायस्कूल हांचो आसपाव आसा.

 

मा/वाप/टीएसएस/अगा/२०१८/१४७०

 

 

 

 

TOP